Уйғур мәдәний ядикарлиқлири 12 ‏- айниң оттурилиридин башлап җәнубий корийидә көргәзмигә қоюлиду

Җәнубий корийә пайтәхти сеулда 12‏- айниң оттурлиридин башлап ечилидиған "йипәк йолидики бүйүк мәдәнийәтләр" көргәзмисидә уйғур илиға аит 145 данә мәдәний ядикарлиқ көргәзмигә қоюлидикән
Муһбиримиз әркин
2010-11-26
Share

Бу һәқтики хәвәрләрдин мәлум болушичә, бу қетимқи көргәзмә җуңго мәдәний ядикарлиқлар алмаштуруш мәркизи билән җәнубий корийә дөләтлик мәркизи музий тәрипидин уюштурулған. Көргәзмә 12‏-айниң 17 - күни ечилидикән. "Йипәк йолидики бүйүк мәдәнийәтләр" намидики мәзкур көргәзмигә хитайниң дөләт музийи, гәнсу вә ниңшя өлкилик музийлардин 200 данә мәдәний ядикарлиқ қоюлсиму, лекин уйғур илиға аит мәдиний ядикарлар асаси салмақни игиләйду.

Көргәзмигә қоюлидиған уйғурларға аит мәдәний ядикарлиқлар турпан ярғул, астанә, крорән, чәрчән зағунлуқ, хотән қарадөң қәдимқи бутханисидин тепилған йипәк буюмлар, язма ядикарлиқлар, алтун буюмлар, яғач әсваплар вә рәсимләрни өз ичигә алидикән. Хитай ахбарат вастилириниң учурлиридин мәлум болушичә, аптоном районлуқ мәдәний ядикарлиқлар идарисидики мәзкур паалийәттин хәвәрдар әрбаплар көргәзмигә қоюлидиған буюмларниң ичидә тарихи әң узун ядикарлиқлар буниңдин 3500 йил бурунқи дәвиргә аит икәнликини, уларниң ичидики22 данә буюм 1 ‏- дәриҗилик қоғдилидиған мәдәний ядикарлиқлар түригә киридиғанлиқини билдүргән.

Лекин, хитай мәтбуатлириниң бу һәқтики хәвәрлиридә, көргәзмигә қоюлидиған 145 данә мәдәний ядикарлиқниң конкрет қайси буюмлар икәнлики вә у вәкиллик қилидиған мәдәнийәт тилға елинмиған. Хитай даирилири өткән йили йүз бәргән үрүмчи 5"‏- июл вәқәси"дин кейин, уйғур мәдәний ядикарлиқлирини чәтәлгә елип чиқип көргәзмә қилишни күчәйткән болсиму, лекин көргәзмигә талланған буюмлар көргәзмини көргән уйғурларда түрлук гуманий қарашларни пәйда қилған иди. Уйғур аптоном районлуқ мозийи өткән йили калифорнийә штатидики боверс музийида ачқан көргәзмидә хитайниң қәдимдин тартип уйғур илини башқуруп кәлгәнликини алға сүрүдиған буюмлар қоюлған вә шундақла уйғурларниң қәдимқи тарим мәдәнийити билән болған мунасивити хунүкләштүрүлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт