Ливийидики исянчилар пайтәхт триполиниң контроллуқини қолиға алди

Әнглийиниң сикай телевизийисиниң нәқ мәйдандин хәвәр қилишичә, исянчиларниң түнүгүнки һуҗуми давамида, казафийниң оғуллири вә муһапизәтчи әскәрлири тәслим болған. Исянчилар, пайтәхттә казафийниң һакимийитиниң йешил байриқини йеқитип, орниға өзлириниң үч рәңлик байриқини қадиған.

Пайтәхт триполидики аһалиләр түнүгүн шәһәр кочилириға топлинип, исянчиларниң ғәлибисини тәнтәнә қилған вә казафийниң рәсимлирини көйдүргән.
Нәччә вақиттин бери өзиниң һәргиз тәслим болмайдиғанлиқини билдүрүп кәлгән казафий, әмди позитсийә өзгәртип, өзиниң исянчилар билән сөһбәт үстилигә келишкә тәйяр икәнликини билдүргән.

Әмма казафийниң қәйәрдә мөкүнүп туруватқанлиқи һазирчә мәлум әмәс. Пайтәхтни қолға чүшүрүштә исянчилар билән һәмкарлашқан нато қисимлири қоманданиниң ахбарат саһәсигә билдүрүшичә, казафийниң тутулуши пәқәтла бир вақит мәсилиси.

Ливийидә йүз бәргән бүгүнки ғәлибә, исянчиларни бүгүнгичә топилаңчилар дәп атаватқан хитай һөкүмити арзу қилған бир нәтиҗә әмәс, хитай исянчиларға ярдәм қилған нато қисимлириниң һәрикитини көп қетим тәнқид қилған. Исянчилар триполини қолға чүшүргәндин кейин, хитай һөкүмитиму позитсийә өзгәртип, өзлириниң ливийә хәлқиниң ирадисигә һөрмәт қилидиғанлиқини билдүрди.