Xitay hökümiti nobél tinchliq mukapati sahibi lyu shawboni “Jinayetchi” dep körsetti

Buningdin bir kün awwal, bu yilliq nobél edebiyat mukapati sahibi mo yén shwétsiye paytexti stokholmda axbarat élan qilish yighini chaqirip, lyu shyawbo heqqidiki so'allargha jawab bérishni ret qilghan. U, muxbirlardin lyu shyawbo heqqide so'al sorap, özini bu mesilide qistimasliqni telep qilghan.

Mo yénning pozitsiyisi chet'eldiki xitay öktichilirini we lyu shyawboning qollighuchilirini ümidsizlendürüp, ularning tenqidige uchrighan. Xitay tashqi ishlar ministirliqining jüme künlük axbarat élan qilish yighinida, bezi muxbirlar xitay hökümitining mo yen'ge yol-yoruq bérip, lyu shawboni tilgha almasliqni telep qilghan-qilmighanliqini sorighan.

Xitay tashqi ishlar ministirliqi bayanatchisi xong léy buninggha jawaben söz qilip: men shu nuqtini eskertmekchi, lyu shyawbo qanun'gha xilapliq qilip, edliye organliri teripidin qamaqqa höküm qilin'ghan shexs, dégen.

Biraq u, özining xewiri yoqluqini ilgiri sürüp, lyu shyawboning ayali lyu shyaning ikki yildin buyan öyige nezerbend qilin'ghanliqi heqqidiki so'algha jawab bermigen. Xong léy eskertip: siz otturigha qoyghan bu mesilidin méning xewirim yoq. Lékin men bir nuqtini eskertmekchi, wetendashlarning qanunluq hoquqi qanun'gha asasen qoghdilidu, dep körsetken.

Lyu shya, peyshenbe küni 26 aydin buyan tunji qétim birleshme agéntliqigha söhbet élan qilip, lyu shyawboning nobél tinchliq mukapati seweblik özining dawamliq a'ile nezerbendide tutup turulushini “Tutamsizliq” dep tenqid qilghan.