Tutqun qilin'ghan 200 muxbirning yérimi xitayda

Merkizi parizhdiki“Chégrasiz muxbirlar teshkilati” bu yilliq doklatida hazirghiche türmide tutup turuluwatqan 200 muxbirning yérimi xitayda ikenlikini bildürdi.
Muxbirimiz méhriban
2012.12.21

Doklattin melum bolushiche, xitayda tutqun qilin'ghan muxbirlar asasen siyasiy sewebler bilen qolgha élin'ghan bolup, ularning ichide zor köpchiliki xitaydiki ammiwi tor béketliride jem'iyetning qarangghu tereplirini, hökümetning siyasitini we yerlik emeldarlarning setchiliklirini pash qilghanliqi üchün qolgha élin'ghan.

Doklatta yene, xitaydiki intérnét kontrolluqining yéqindin buyan yene kücheytilgenliki bayan qilinip, bir partiyilik mustebit xitay dölitide puqralarning erkin pikir qilishigha yol qoyulmighanliqi tenqidlen'gen. Halbuki, xitayning hökümet axbarati bolghan xelq géziti qarmiqidiki “Yer shari waqti géziti”ning bügün 21-dékabir jüme küni élan qilghan “Tor bashqurushni kücheytish xelq rayigha asasen bolghan ” serlewhilik maqaliside xitay hökümitining intérnét kontrolluqi aqlinip, xitayda tor abuntlirining bixeterliki üchün junggo hökümitining intérnét kontrolluqini kücheytkenliki tekitlendi.

Xitay türmiliride yétiwatqan muxbirlar we tor yazghuchiliri ichide 5-iyul ürümchi weqesi mezgilide tutqun qilin'ghan Uyghur muxbirliri we tor yazghuchilirimu bar bolup, ulardin siyasiy mehbus gülmire imin we muhemmet abdulla qatarliq ikkiylen merkizi nyuyorktiki dunya kishilik hoquqni közitish teshkilati teripidin tesis qilin'ghan hellman-hammett namidiki 2012-yilliq xelq'ara söz erkinliki mukapatigha érishken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.