Nyu-york waqti géziti muxbiri xitaydin qoghlap chiqirildi

U 2012-yili ichide muxbirliq wizisini yéngilash üchün bir qanche qétim xitay da'irilirige iltimas sun'ghan bolsimu, jawab alalmighan we netijide düshenbe küni u “Wizisi yéngilanmighanliqi” bahanisi bilen xitaydin qoghlap chiqirilghan. Kiris bukliy hazir waqtinche a'ilisi bilen birlikte xongkonggha kelgen.

Nyu-york waqti gézitining éytishiche, xitay tashqi ishlar ministirliqi gézitning bu heqtiki so'allirini jawabsiz qoyghan. Gézitning aliy muherriri jil abramson bügünki bayanatida, özining bu ehwaldin qattiq epsuslan'ghanliqini bildürdi.

Nyu-york waqti géziti bundin ikki ay ilgiri xitay bash ministiri wén jyabawning a'ile bisati ashkarilan'ghan bir maqalini élan qilip zor ghulghula peyda qilghan idi. Uningda gézit bir yilliq tekshürüsh netijiside wén a'ilisining 7.2 Milyard dollar qimmitide bisati barliqini tekshürüp éniqlap chiqqan. Xewerlerde, nyu-york waqti géziti muxbirining wizisining yéngilanmasliqi mana mushuning bilen munasiwetlik, dep qaralmaqta.

Bu yil 5-ayda xitay da'iriliri yene eljezire qanilining tonulghan muxbiri mélissa chén'gimu oxshash usul qollinip, uni xitaydin qoghlap chiqarghan idi.