Xitay da'iriliri qaramayda yüz bergen naraziliq namayish heqqidiki uchurlarni qattiq kontrol qilghan

Mezkur weqening del 12-dékabir oqughuchilar namayishining 27 yilliq xatire küni yüz bérishi axbarat wasitilirining diqqitini qozghighan. Radi'omiz namayish qilghan ata-anilar we munasiwetlik hökümet organlirigha téléfon qilip, ehwal igileshke tirishqan bolsimu, biraq héchqandaq bir téléfon ulanmidi.

Bu namayishqa munasiwetlik kishilerning téléfoni kontrol qilin'ghanliq gumani qozghighan. Téléfon ulan'ghan organlardiki xadim-emeldarlar bolsa uchur bérishni ret qildi. Qaramay sheherlik emgek idarisining bir xitay emeldari, weqeni inkar qilmighan bolsimu, biraq muxbirimizgha uchur igilimekchi bolsa, qaramaygha kélishini telep qilghan.

Qarimayda namayish yüz bergenlik xewiri tunji qétim “Uyghur biz” torida élan qilin'ghan. Gheyriy resmiy uchurlarda ilgiri sürüshiche, shinjang néfit bashqurush idarisi yéqinda ish kütüp turghan 8 ming kishidin imtihan élip, peqet 160 kishini ishqa orunlashturghan. Biraq oxshash bir waqitta, ichkiridin ming neper xitayni yötkep kélip ishqa orunlashturghan. Bu yerlik Uyghur, tunggan we qazaq ishchi-xizmetchilerning naraziliqini qozghighan.