Қирғизистандин 50 миң русийилик көчүп кетиду

Оттура асия җумһурийәтлиридә яшайдиған русларни өз ичигә алған өзлирини русийилик дәп һесаблиған кишиләр түркүм - түркүмләп русийигә көчүп маканлашмақта.
Мухбиримиз үмидвар
2008.11.23

Йеқинда русийә көчмәнләр идарисиниң қирғизистанда турушлуқ вәкили владимир филиппов 50 миң адәмниң русийигә көчүш илтимаси сунғанлиқи, буниң ичидә 30 миң адәмниң русийигә көчүп маканлашқанлиқини мәлум қилған.

Қирғизистанниң "24 саәт" дәп аталған учур агентлиқиниң хәвиригә қариғанда, мәзкур русийә көчмән ишлири әмәлдари мәзкур көчмәнләрниң %65 ниң русийиниң калиниңрад областиға, аз бир қисиминиң тамбов областиға орунлаштурулидиғанлиқини тәкитлигән. Хәвәрдә ейтилишичә, қирғизистандин көчкән русийә көчмәнлири өзлиригә қолайлиқ, һава килимати қирғизистан билән азрақ болсиму, йеқинчилиқи бар җайларға көчүшкә интилгән болуп, русийиниң бәзи өлкилири гәрчә адәмгә муһтаҗ болсиму, лекин көчмәнләрни орунлаштуруш вә параванлиқ ишлирини яхши елип бармиған икән.

Буниңдин бир қанчә йил илгири русийә һөкүмити һәр қайси сабиқ совет иттипақи җумһурийәтлиридә яшайдиған русларни вә башқа өзлирини русийилик дәп һесаблиған һәмдә буниң үчүн асасий бар кишиләрни өз ичигә алған 25 милйон адәмни русийигә көчүрүп келип маканлаштуруш пиланини елан қилған иди.

Буниңға оттура асия җумһурийәтлиридики руслар аваз қошқан болуп, түркмәнистан, таҗикистан, қирғизистан вә өзбекистандики руслар арисида көчүш долқуни қозғалған. Әмма қазақистандикиләр арисида көчүш кәйпияти азрақ икәнлики мәлум. Русийә һөкүмити өз вәтәндашлирини көчүрүп келиштә бир қатар бәлгилимиләрни чиқарған иди.

Оттура асияда русларниң пәйда болуши 18 - әсирдин башланған болуп, уларниң әң көп кәлгән вақти совет иттипақи мәзгили, болупму 1960 - йиллар иди. Оттура асияда русларни өз ичигә алған славиянларниң сани әң көпәйгәндә 9 милйондин ашқанлиқи мәлум, лекин бу җумһурийәтләр мустәқил болғандин кейин русларниң көчүши үзлүксиз тохтимиған болуп, бурунқидин коп азлап кәткән һәмдә давамлиқ азлимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.