Qirghizistandin 50 ming rusiyilik köchüp kétidu

Yéqinda rusiye köchmenler idarisining qirghizistanda turushluq wekili wladimir filippow 50 ming ademning rusiyige köchüsh iltimasi sun'ghanliqi, buning ichide 30 ming ademning rusiyige köchüp makanlashqanliqini melum qilghan.

Qirghizistanning "24 sa'et" dep atalghan uchur agéntliqining xewirige qarighanda, mezkur rusiye köchmen ishliri emeldari mezkur köchmenlerning %65 ning rusiyining kaliningrad oblastigha, az bir qisimining tambow oblastigha orunlashturulidighanliqini tekitligen. Xewerde éytilishiche, qirghizistandin köchken rusiye köchmenliri özlirige qolayliq, hawa kilimati qirghizistan bilen azraq bolsimu, yéqinchiliqi bar jaylargha köchüshke intilgen bolup, rusiyining bezi ölkiliri gerche ademge muhtaj bolsimu, lékin köchmenlerni orunlashturush we parawanliq ishlirini yaxshi élip barmighan iken.

Buningdin bir qanche yil ilgiri rusiye hökümiti her qaysi sabiq sowét ittipaqi jumhuriyetliride yashaydighan ruslarni we bashqa özlirini rusiyilik dep hésablighan hemde buning üchün asasiy bar kishilerni öz ichige alghan 25 milyon ademni rusiyige köchürüp kélip makanlashturush pilanini élan qilghan idi.

Buninggha ottura asiya jumhuriyetliridiki ruslar awaz qoshqan bolup, türkmenistan, tajikistan, qirghizistan we özbékistandiki ruslar arisida köchüsh dolquni qozghalghan. Emma qazaqistandikiler arisida köchüsh keypiyati azraq ikenliki melum. Rusiye hökümiti öz wetendashlirini köchürüp kélishte bir qatar belgilimilerni chiqarghan idi.

Ottura asiyada ruslarning peyda bolushi 18 - esirdin bashlan'ghan bolup, ularning eng köp kelgen waqti sowét ittipaqi mezgili, bolupmu 1960 - yillar idi. Ottura asiyada ruslarni öz ichige alghan slawiyanlarning sani eng köpeygende 9 milyondin ashqanliqi melum, lékin bu jumhuriyetler musteqil bolghandin kéyin ruslarning köchüshi üzlüksiz toxtimighan bolup, burunqidin kop azlap ketken hemde dawamliq azlimaqta.