Rabiye qadir xanim “Haffington pochta géziti” de xitay xelqige qarita chaqiriqname élan qildi

Amérika we en'gliye qatarliq döletlerde chiqidighan nopuzluq xelq'araliq axbarat wasitiliridin “Haffington pochta géziti” de, bügün Uyghur milliy herikiti rehbiri rabiye qadir xanimning xitay xelqige qaritip yazghan bir chaqiriqnamisi élan qilindi.
Muxbirimiz jüme
2011.08.20

Chaqiriqnamide, xitay hökümitining xoten we qeshqer weqesidin kéyin burun ünüm bermigen basturush siyasitini yene qayta yolgha qoyghanliqi, buning bilen xitay xelqi bilen Uyghurlar arisigha tügimes bir adawet uruqini chéchiwatqanliqi bayan qilinip, xitay xelqi bu siyasetning toghra-xataliqi we aqiwiti heqqide wijdani bilen oylinip béqishqa chaqirilghan.

Chaqiriqnamide yene bir qisim xitay puqralirining “5‏-Iyul weqesi” din kéyin hökümet bilen bir septe turup, Uyghurlargha qarshi ashkara zorawanliq yürgüzgenliki tilgha élinip, bir qisim xitay puqralirining Uyghur mesiliside hökümetning teshwiqatigha egiship kétiwatqanliqi, buning ikki milletning kelgüsi ewladlirining menpe'iti üchün éghir bir tehdit ikenliki otturigha qoyulghan.

Chaqiriqnamide, xitay kompartiyisining xitay xelqini idare qilishta ötmüshte kommunizm sho'ari bilen aldap kelgen bolsa, emdilikte “Dölet bixeterliki we dölet pütünlüki” dégen sho'ari bilen aldawatqanliqi eskertilgen. Döletlerdiki milliy mesililerni bir terep qilishta, hökümetlerning ötkünchi, xelqlerning bolsa, menggülük rol oynaydighanliqi eskertilgen chaqiriqta, xitay kompartiyisining xitaydiki milliy mesililerni toghra hel qilish niyiti hem qabiliyiti yoqluqi, sherqi türkistan mesilisini, xitay we Uyghur xelqining iradisige heqiqiy wekillik qilidighan ikki guruppiningla di'alog yol bilen hel qilishqa qadir ikenliki eskertilgen. Chaqiriqnamide Uyghurlar bilen xitaylar arisidiki munasiwetke da'ir yene köpligen mesililer bayan qilinip, axirida xitay xelqini sherqi türkistan mesiliside heqiqetni yaqlashqa we zulumgha yantayaq bolmasliqqa chaqirilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.