Sanjidiki bir kömür kénida hadise yüz bérip, 6 adem öldi

Sanjidiki xungshing namliq bir kömür kénida seyshenbe küni hadise yüz bérip, 6 adem ölgen, 6 adem yarilan'ghan. Hadise yüz bergen kan tudunxabada bolup, sanji shehirige 70 kilométir kélidu.
Muxbirimiz erkin
2012-08-29
Élxet
Pikir
Share
Print

Xitay köchmenlirining bashqurushidiki mezkur xususi kömür kéni yiligha 90 ming tonna kömür ishlepchiqirish iqtidarigha ige. Shinxu'a agéntliqining kömür kan da'iriliridin neqil keltürüp xewer qilishiche, hadise ishchilar quduq astida meshghulat élip bériwatqanda yüz bergen bolup, qutquzush xadimliri quduq astidin 6 jesetni qézip chiqarghan. Yarilan'ghan 6 kishi bolsa, etraptiki doxturxanigha élip bérilghan. Lékin xitay axbarat wasitilirining xewerliride hadisining kélip chiqish sewebi tilgha élinmighan.

Xitay dunyadiki kömür kanlirida weqe yüz bérip, adem ölüsh ehwali eng éghir dölet. Sanliq melumatlardin melum bolushiche, xitayda yilliq qéziwélin'ghan kömür dunyadiki yilliq qéziwélin'ghan omumi kömür miqdarining texminen 30% ini igilisimu, biraq her yili kömür kan weqeliride ölgen adem sanining 70% ni igileydu.

Xitay da'irilirining ashkarilishiche, 2011-yili xitay boyiche 1973 kishi kömür kan weqeside ölgen. Biraq, da'iriler bu yil ünümlük tedbir qollinip, bixeterlik ishlepchiqirishni kücheytkenliktin, 2011-yili kömür kan weqeside ölgenlerning aldinqi yilqidin 19% azayghanliqini ilgiri sürmekte. Xitay hökümiti 5-iyul weqesidin kéyin, gherbning tokini sherqqe yötkesh pilanini otturigha qoyup, Uyghur élide kömür éléktr istansilirini kéngeytip qurushqa bashlighan idi.

Közetküchilerning ilgiri sürüshiche, bu qurulush kömürge bolghan éhtiyajni ashurghan. Muhit weyranchiliqini tézlitip, rayondiki ezeldinla bixeterlik ishlepchiqirish asasi eslihesi nachar kömür kanlirida weqe yüz bérish éhtimalliqini kücheytiwetken.

Toluq bet