Uyghur élide az dégende 20 mingdin artuq nareside balining sergerdanliqta hayat kechürüwatqanliqi ashkarilanmaqta
2011.06.22
Mezkur xewerde bildürülüshiche, Uyghur aptonom rayonluq xelq ishlar nazariti, bu yil 20-apréldin 17-iyun'ghiche, xitay ölkiliridin jem'iy 144 neper Uyghur sergerdan balini qayturup ekelgen. Buning bilen, yéqinqi yillardin béri xitay ölkiliridin qayturup kélin'gen sergerdan nareside balilar 3858 adem qétimgha, Uyghur élining herqaysi wilayetliride qutquzuwélin'ghan sergerdan nareside balilar 17838 adem-qétimgha yetken. Xewerde bildürülüshiche, sergerdan balilarni qutquzush herikiti yene dawamlashmaqta.
Yuqiriqi sanliq melumatlar we qutquzushning dawamlishiwatqanliqidin, nöwette Uyghur jem'iyitide az dégende 20 ming Uyghur nareside balining sergerdanliqta hayat kechürüwatqanliqi melum.
Gerche xewerde hökümet organlirining nareside balilarni xitay ölkiliridin qayturup ekélishi we Uyghur élidikilirini toplash herikiti nareside balilarni qutquzush dep teriplen'gen bolsimu, emma muhajirettiki Uyghur pa'aliyetchiliri buning heqiqiy menidiki bir qutquzush ikenlikige guman bilen qarimaqta.
Dunya Uyghur qurultiyining bayanatchisi dilshat rishit bügün bu heqte pikir bayan qilip, xitay hökümitining bu ishta, peqet özlirining dölet obrazi we jem'iyet amanliqini közde tutuwatqanliqini eskertti.
Dilshat rishit Uyghur élide sergerdan balilarning bu derijide köp bolushining sewebini Uyghurlarning nöwettiki siyasiy, iqtisadi we ijtima'iy orni bilen biwasite munasiwetlik dep eskertti.