Shimaliy koriye jenubiy koriyige tehdit saldi

Shimaliy koriyining“ Wetenni tinch birlikke keltürüsh komitéti” teripidin élan qilin'ghan bayanatta yene, “Sirttin kelgen herqandaq ighwagerchilik we tajawuzchiliqqa taqabil turidighanliqi, ikkilenmey öch élish herikiti qollinidighanliqi” ni bildürgen.

B d t xewpsizlik kéngishi seyshenbe küni qarar maqullap, shimaliy koriyining ötken yili 12‏-ayda rakéta qoyup bergenlikini tenqid qilghan we shimaliy koriyige émbargo qoyghan idi.

Lékin shimaliy koriye b d t ning qararigha shiddetlik inkas qayturup, rakéta we yadro qorallar siniqi élip baridighanliqini jakarlighan. Shundaqla yene, amérikigha yadro oq béshi orunlashturulghan rakéta bilen zerbe bérish iqtidari barliqini bildürgen.

Birleshme agéntliqining jüme küni bildürüshiche, shimaliy koriye yadro siniqi élip bérish teyyarliqini asasen püttürüp bolghan.

Shimaliy koriye bayanatida yene sé'ulgha tehdit sélip, eger sé'ul shimaliy koriye yadro qorallar mesiliside dawamliq amérikigha qarighularche egeshse, 1992‏-yili imzalan'ghan “Koriye yérim arilini yadro qoralliridin xali qilish toghrisidiki ortaq xitabname” ni bikar qilidighanliqini agahlandurghan.