Йүннәндики тағ ғулаш вәқәсидә мәктәптики балилар һаятидин айрилди
2012.10.04
Даириләр һазирғичә вәқәдә 16 балиниң өлгәнликини елан қилди. Мәктәптики қалған оқуғучилар вә харабә астида қалған йеза аһалилирини қутқузуш хизмәтлири давам қиливатқан болуп, 2000 дәк аһалә қоллири билән харабиликләрни колап адәм қутқузушқа тиришмақта икән.
Франсийә агентлиқиниң ейтишичә, вәқә йүз бәргән вақитта балилар мәктәптә дәрс оқуватқан болуп, хитайда дөләт байрими мунасивити билән тәтил қоювәткән мәзгилдә, немә үчүн балиларниң мәктәпкә оқушқа орунлаштурулғанлиқи кишиләрни әҗәбләндүргән. Йәрлик даириләр бу балиларниң алдинқи айда йүннәндә йүз бәргән йәр тәврәш сәвәбидин кәм қалған дәрслирини толуқлаш үчүн дәрс оқушқа орунлаштурулғанлиқини ейтқан.
Даириләрниң җаваби хитайдики тор қолланғучилири арисида күчлүк инкас пәйда қилған. Чүнки алдинқи айда йүз бәргән йәр тәврәштә йезидики мәктәпләр наһайити еғир зәхимигә учриған болуп, балилар техи ремонт қилинмиған синипларда дәрс оқушқа орунлаштурулған. Мулаһизиләрдә даириләр, балиларниң һаяти бихәтәрлики билән ойнашти дәп тәнқид қилинған.
Хитайдики мәктәпләрниң қурулуш сүпитидики мәсилиләрниң қанчилик дәриҗидә еғирлиқи 2008-йили сичүәндә йүз бәргән йәр тәврәш апитидә ашкариланған. У йәр тәврәштә җәмий 80 миңдин артуқ киши һаятидин айрилған болуп, буларниң көпини мәктәп биналирида дәрс оқуватқан балилар тәшкил қилиду.