Хитайниң тазилиқ қәғәзлири зәһәрлик чиқти

Йеқинда хитайниң гуаңҗу шәһиридә рак пәйда қилидиған зәһәрлик тазилиқ қәғәзлири байқалған. Хоңкоңда чиқидиған "қуяш" гезитиниң хәвәр қилишичә, хуаң фамилилик бир аял йеқинда тазилиқ қәғизи ишләткәндин кейин қаттиқ биарам болған вә өзи ишләткән қәғәздин гуманлинип уни көйдүрүп көргән. Қәғәзни көйдүргәндин кейин униңда май тәркибиниң қепқалғанлиқини байқиған.
Мухбиримиз ирадә
2010.05.11
Share on WhatsApp
Share on WhatsApp

Хәвәрдә баян қилинишичә, хитайда тазилиқ қәғәзлириниң көпи әски - түски қәғәзләрни қайта пишшиқлаш арқилиқ ишләпчиқирилидиған болуп, йиғивелинған қәғәзләрни "ақ вә юмшақ" қилиш үчүн нурғунлиған химийилик маддилар ишлитилидикән.

Бу саһәдики кишиләрниң ашкарилишичә, өлчәмлик тазилиқ қәғизи ишләпчиқириш юқири тәннәрх вә юқири техника тәләп қилидикән. Хитайдики завутларниң көпинчисидә бундақ юқири техника болмиғанлиқтин, қәғәзни ақартиш үчүн адәттә ялтирақ мадда көп ишлитилидикән. Бу хил ялтирақ мадда адәм бәдини билән көп учрашқан тәқдирдә рак кесили пәйда қилидиған болуп, бу саһәдики кишиләрниң билдүрүшичә, хитайда тазилиқ қәғизи ясашта бу хил маддини ишлитиш адәттики ишқа айлинип қалған.

Хитайда зәһәрлик сүт парашоки, зәһәрлик тухум, зәһәрлик оюнчуқ, зәһәрлик ваксина вәқәлири оттуриға чиққандин кейин, әмди тазилиқ қәғизиниңму зәһәрлик чиқиши хитайдики истемалчиларда қаттиқ әнсизлик яратмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.