Teywenning gawshyong shehiri rabiye xanim heqqidiki filimni qoyushni qayta oylishidighanliqini élan qildi

Fransiye agéntliqining xewer qilishiche, tibet rohani dahisi dalay lamaning gawshyongda élip barghan yéqinqi ziyaritidin kéyin, xitayning gawshyonggha sayahet qilishni bayqut qilghanliqigha da'ir xewerler gawshyongning sayahet we siyasi sehnisidiki zatlarni endishige salghan.

Gawshyong méhmanxanilar jem'iyiti yerlik da'irilerni rabiye qadir xanim heqqidiki "muhebbetning 10 sherti" dégen filimni qoyushtin waz kéchishke chaqirghan. Gawshyong sheherlik hökümetning bayanatchisi chang jyashing "bizning bu filimni qoyush pilanimiz bar, lékin biz hazir qoyush ‏ - qoymasliqni qayta közdin köchürüwatimiz," dégen.

Teywendiki "junggo waqti géziti" xitay hökümitining chong quruqluqtiki sayahet shirketlirige yolyoruq bérip, gawshyong shehirige sayahetchi aparmasliqni agahlandurghanliqini, gawshyongdiki méhmanxanilargha bérilgen yataqxana zakaslirining bikar qilin'ghanliqini bildürgen.

Lékin teywen dimokratiye tereqqiyat partiyisi xitay da'irilirini tenqid qilghan bolup, mezkur partiyining xelq'ara ishlar mes'uli "bizning xalighan kinoni körüsh erkinlikimiz bar. Bu söz erkinliki we ipade erkinlikining bir qisimi" dégen.