Далай лама: тибәт вәзийити наһайити җиддий әһвалда

Тибәт роһани даһиси далай лама чаршәнбә күни тибәт вәзийитиниң наһайити җиддий әһвалда туруватқанлиқини агаһландуруп, тибәт хәлқиниң йәнә исян көтүрүш еһтимали барлиқини билдүрди.
Мухбиримиз әркин
2009-02-11
Share

Далай лама бу сөзләрни германийиниң баден баден шәһиридә елип барған зиярити җәрянида тәкитлигән болуп, у" бүгүн у йәрдә ғәзәп - нәпрәт чекигә йәтти.... Вәзийәт наһайити җиддий " дегән.

Келәр ай тибәт хәлқиниң 1959 ‏ - йили коммунистик һакимийәткә қарши елип барған хәлқ қозғилиңиниң 50 йиллиқи тошудиған ай болуп, далай лама вәзийәтниң өзини наһайити әндишигә селиватқанлиқини, чүнки тибәтниң һәр вақит исян партлаш гирдабида туруватқанлиқини билдүргән. У мундақ дәйду ": зораванлиқниң һәр вақит йүз бериш еһтимали бар. Мениң әндишә қилидиғиним исян йүз бәрсә техиму көп бастуруш елип берилидиғанлиқидур. Ишлар наһайити көңүлсиз."

Далай лама баден баденда мухбирларни күтүвалған шу күни хитайниң шинхуа агентлиқи хәвәр тарқитип, 2008 ‏ - йили 14 ‏ - марттики тибәт исянидин кейин зораванлиққа қатнашқан 76 тибәтликниң җазаланғанлиқини, аз кәм миңға йеқин тибәтликниң қолға елинғанлиқини илгири сүргән. Лекин хитай һөкүмити илгири җазаланған тибәтликләрниң санини 55 дәп елан қилған иди.

Даириләр 14‏ - март лхаса исянида 22 адәмниң өлгәнликини елан қилған болсиму, лекин һиндистандики тибәт сәргәрдан һөкүмити өлгәнләрниң 200 дин ашидиғанлиқини җакарлиған. Далай лама баден бадендики сөзидә " өлүм җазасини ашкара елип бериш тәс болғанлиқтин қолға елинған тибәтликләр тән җазасиға учримақта. Кишиләргә қолға елинған һаман тән җазаси берилмәктә, бәзидә уларниң өлүшини кәлтүрүп чиқармақта" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт