Чеграсиз мухбирлар тәшкилати өзини көйдүрүш вәқәси һәққидә учур йоллиған тибәтлик раһибниң қамақ җазасиға һөкүм қилинғанлиқини тәнқид қилди

Чеграсиз мухбирлар тәшкилати, тибәтлик раһибә тәнзин ваңмониң 2011‏-йили 10‏-айда йүз бәргән өзини көйдүрүш вәқәсини рәсимгә тартип, бу һәқтики учурларни ахбарат васитилиригә йоллиған тибәтлик раһиб йонтән гятсуни 7 йиллиқ қамақ җазасиға һөкүм қилғанлиқини тәнқид қилди.
Мухбиримиз әркин
2012.08.23
Share on WhatsApp
Share on WhatsApp

Чеграсиз мухбирлар тәшкилатиниң илгири сүрүшичә, йонтән гйтасу хитай дөләт бихәтәрлик даирилири тәрипидин тутқун қилинғандин кейин қаттиқ қийин-қистаққа елинған вә тән җазасиға учриған. У бу йил 18‏-июн күни сичүәнниң аба оттура сот мәһкимиси тәрипидин сотлинип, 7 йиллиқ қамақ җазасиға һөкүм қилинған болсиму, бирақ аилиси униң әһвалидин чаршәнбә күни хәвәр тапқан.

Йонтән гятсу, 2011‏-йили 18‏-өктәбир күни абадики каши гйефел самтенлиң ибадәтханисида қолға елинип, чеңдудики бир қамақханиға соланған. У, рәсимгә тартқан раһибә тәнзин ваңмо тибәт раһиблири 2011‏-йили 3‏-айдин башлап өзини көйдүрүп хитайға қарши наразилиқ һәрикити қозғиғандин буян, өзигә от қойған тунҗи аял раһибә. Униң өзигә от қоюши вә йонтән гятсу тартқан рәсими хәлқара ахбарат васитилиридә елан қилинип, зор ғулғула қозғиған.

Һазирға қәдәр 50 кә йеқин тибәтлик өзини көйдүрүп, хитай һөкүмитиниң тибәттики диний бастуруш вә һөкүмранлиқ сияситигә наразилиқ билдүргән.

Тибәт сәргәрдан һөкүмити, чәтәлдики тибәт кишилик һоқуқ тәшкилатлири вә ғәрб әллири хитай һөкүмитини далай лама билән сөһбәт өткүзүшкә чақирип, тибәт сияситини өзгәртишкә үндәп кәлгән болсиму, бирақ хитай һөкүмити тибәтләрниң диний әркинлик сияситидин толуқ бәһримән болуватқанлиқини билдүрүп, өзини көйдүрүш вәқәлиригә тибәт роһаний рәһбири далай ламаниң қутратқулуқ қиливатқанлиқини илгири сүрүп кәлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.