Türkiyidiki xitay elchixanisi Uyghur oqughuchilargha atalmish oqush mukapat puli tarqitish üchün heriket qilmaqta

Melum bolushiche, elchixanining bu heqte élip bériwatqan heriketliri Uyghur oqughuchilarni atalmish oqush mukapat pulini élishqa qiziqturidighan uqturush we ankitlarni tarqitish, yighin'gha dewet qilish we Uyghur oqughuchilarning wetendiki a'ile-tawabatliri bilen söhbet ötküzüsh qatarliq qiziqturush we tehdit sélish sheklide dawam qilmaqta.

Muxbirimizning igilishiche, hazirgha qeder xitayning oqush mukapati tarqitish toghrisidiki yighin'gha qatnashqan oqughuchilarning barliqi téxi bayqalmighan.

Uyghur oqughuchilar bilen biwasite uchrishish pursitige érishelmigen elchixana xadimliri bir tereptin bir qisim mektep rehberliri bilen sözliship ularning hemkarlishishini telep qilsa, yene bir tereptin bezi oqughuchilargha namelum kishiler arqiliq téléfon qilip, oqush mukapat pulini qobul qilish heqqide psixik jehettin bésim ishletken.

Nöwette türkiyidiki Uyghur oqughuchilarning omumyüzlük halda elchixanidin bérilidighan bu mukapat pulidin özini tartiwatqanliqi melum. Melum bolushiche, türkiyide oquwatqan Uyghur oqughuchilar asasen shexsiy xirajiti bilen, türkiye hökümiti yaki türk we Uyghur fond jem'iyetlirining yardimide oquwatqanlardur.

Uzun yillardin béri Uyghur oqughuchilarning chet'elde ilim tehsil qilishigha tosqunluq qilip kéliwatqan xitay hökümitining birdinla oqush mukapat puli tarqitishqa ötüshtek kütülmigen merhemiti, chet'elde öz xirajiti bilen oquwatqan Uyghur oqughuchilarning mutleq köp qismining qiziqishini qozghiyalmidi.