Үрүмчи шәһиридики сәргәрдан балиларни қутқузуш мәркизиниң қурулушида иш башланди

Хитай ахбарат васитилири бу һәқтики хәвәрлиридә “өсмүр балиларни қутқузуш, қоғдаш, орунлаштуруш, тәрбийиләш мәркизи” ниң қурулушиға 88 милйон йүән мәбләғ селинип, 16 миң квадрат метир көләмдики мәзкур орунда 500 кариват тәсис қилинидиғанлиқини илгири сүргән.

Әгәр хитай ахбарат васитилириниң хәвәрлиридики бу учур тоғра болуп, мәзкур қурулуш пүтүп чиқса, бу хитайдики әң чоң сәргәрдан балиларни йиғивелиш мәркизи болуп қалиду. Лекин бәзи көзәткүчиләрниң илгири сүрүшичә, мәзкур қурулушниң сәргәрдан балиларни вақитлиқ йиғивалидиған яки уларни тәрбийиләп йетиштүридиған узун мәзгиллик тәрбийиләш орни икәнлики ениқ әмәс.

Йеқинда аптоном районлуқ аяллар бирләшмиси даириләрни агаһландуруп, хитай өлкилиридин қутқузуп чиққан сәргәрдан балиларни орунлаштуруш мәсилиси қийинчилиққа йолуққанлиқи, бәзи аилиләрниң уларни беқиш, тәрбийиләп кетишкә қурби йәтмәйдиғанлиқини билдүргән.

Уйғур балиларни алдап хитай өлкилиригә апирип, оғрилиқ, янчуқчилиқ қатарлиқ һәр хил җинайи һәрикәтләргә салидиған әһвал, йеқинқи он нәччә йилдин буян уйғур җәмийитини сарасимға салидиған зор иҗтимаий мәсилә болупла қалмай, хитай җәмийитиму биарам қилидиған иҗтимаий мәсилигә айлинип қалған иди.

Хитай һөкүмити 5-июл вәқәсидин кейин, ичкиридики уйғур сәргәрдан балиларни қайтуруп келиш һәрикити башлиған. Даириләр, немә үчүн бу һәрикәтни 5-июл вәқәсидин кейин елип бериш зөрүрийити туйғанлиқини чүшәндүрмигән болсиму, бирақ бәзи көзәткүчиләр, бу һәрикәтниң бир тәрәптин уйғурларни бәзләш, йәнә бир тәрәптин өзлириниң аманлиқини көзләп елип берилғанлиқини илгири сүргән.