ئۈرۈمچىدىكى بىر قىسىم ئۇيغۇر دۇكانلىرىنىڭ ۋىۋىسكىلىرى ئېلىپ تاشلاندى

ئۇيغۇر بىز تور بېكىتىنىڭ خەلقئارا تور بېكىتىدە ئېلان قىلىنغان بۇ ھەقتىكى خەۋەردە دېيىلىشىچە، ئۇيغۇرلارنىڭ تىجارەت دۇكانلىرىدىكى ۋىۋىسكىلارنىڭ مەجبۇرىي ئېلىۋېتىلىشى دۇكان ئىگىلىرىگە ئىقتىسادى زىيان ئېلىپ كەلگەن. ئەمما ئۇيغۇرلارنىڭ دۇكانلىرىدىن 500 مېتىر يىراقلىقتىكى خىتايلار ئاچقان دوستلۇق سودا دۇكىنىنىڭ ۋىۋىسكىسىدا ئۇيغۇرچە خەت يېزىلمىغان بولسىمۇ ئۇنىڭغا چارە كۆرۈلمىگەن. دوستلۇق سودا سارىيى قاتارلىق ئۇيغۇرچە يېزىق يېزىلمىغان نۇرغۇنلىغان خىتاي دۇكانلىرىنىڭ ۋىۋىسكىلىرىنىڭ ئۆز جايىدا تۇرۇۋېرىشى ئۇيغۇرلار ئارىسىدا غۇلغۇلا پەيدا قىلدى.

ئۇيغۇر ئاپتونوم رايونىنىڭ ئاپتونومىيە قانۇنىدا ھەمدە ھۆكۈمەتنىڭ ئىدارە، ئورگان ۋە ئاممىۋى سورۇنلارنىڭ ۋىۋىسكىلىرى ھەققىدىكى بەلگىلىمىلىرىنىڭ ھەممىسىدە، ئۇيغۇرچە ۋە خىتايچە يېزىقنى ئۆلچەملىك ھالدا بىللە يېزىش تەلەپ قىلىنغان. ئەمما، يېقىندىن بۇيان ئۇيغۇر ئاپتونوم رايونىدىكى كۆپلىگەن ئاممىۋى سورۇنلاردىكى ۋىۋىسكىلاردا پەقەتلا خىتايچە يېزىقنىڭ يېزىلىشى ياكى ئۇيغۇرچە يېزىق يېزىلغان ھالەتتىمۇ، خىتايچە خەتلەرنىڭ ئۈستىگە ياكى ئاستىغا كىچىك ھەم كۆرۈمسىز قىلىپ، ئىملاسىغىمۇ دىققەت قىلمىغان ھالەتتە يېزىلىشى ئۇزۇندىن بۇيان ئۇيغۇرلارنىڭ نارازىلىقىنى قوزغاپ كېلىۋاتقان مەسىلىلەرنىڭ بىرى ئىدى.