Xitay da'iriliri yash Uyghur diniy zatlargha 18 - qurultay rohini ögetken

Bu siyasi öginish kursini xitay kompartiyisi yashlar ittipaqi we fujyen ölkisi birlikte teshkilligen. Fujyen ölkisige élip bérilghan 30 Uyghur diniy zat bir hepte boyiche 18 - qurultay rohi heqqide chüshenche, partiyining diniy siyasiti, fujyen ölkisining iqtisadiy tereqqiyat ehwali qatarliq témilarda léksiyilerge orunlashturulghan.

Xitay da'iriliri Uyghur élide bir yaqtin musulmanlarning diniy pa'aliyetlirini qattiq nazaret astigha alsa, yene bir yaqtin diniy zatlarni partiyining teshwiqatini qilidighan “Wetenperwer” dini zatlardin bolushqa mejburlap kelmekte.

Xitay da'irilirining 30 neper yash Uyghur diniy zatni bundaq kursqa orunlashturushimu yuqiridiki ehwalni yorutup bermekte. Chünki, xitay yashliri gézitide chiqqan xewerdin ashkarilinishiche, bu yashlargha “Partiyining siziqidin chiqmasliq, wetenni söyüsh, kommunizm yolidin tewrenmeslik, shinjangning menggülük eminlikke érishishige töhpe qoshush” terbiyisi bérilgen we ulardin wede élin'ghan.

Xitay da'irilirining dinni bésim astigha élish we diniy zatlarni özining siyasiy teshwiqatchisigha aylandurushtek kishilik hoquqni éghir depsende qilish herikiti kishilik hoquq organliri teripidin qattiq tenqidlinip kelmekte. Amérika dölet mejlisi diniy ishlar komitétimu xitayni Uyghurlarning diniy erkinlikige hörmet qilish toghrisida agahlandurghan idi.