Бейҗиңға кәлгән уйғур әрздарлар арисиға диний чәклимиләр үстидин әрз қилғучилар қошулди

Бу кишиниң билдүрүшичә, бу қетим бейҗиңға кәлгән уйғур әрздарлар арисиға илгирикидәк йәр даваси вә өй-земин дәваси қилип кәлгән әрздарлардин башқа, уйғур районида елип бериливатқан диний етиқад җәһәттики түрлүк чәклимиләргә наразилиқини билдүрүш үчүн кәлгән уйғурларму қошулған.

Йеқиндин буян нормал диний етиқад паалийәтлири чәклимигә учрап, һәтта уйғур аяллириниң яғлиқ артиши, әрләрниң сақал қоюшиғиму чәклимә қоюлғанлиқини билдүргән бу әрздарлар хитай һөкүмитидин “пуқраларниң қанунда бәлгиләнгән диний етиқад әркинликигә һөрмәт қилиниш” ни тәләп қилидиғанлиқини билдүргән.

Бу йил киргәндин буян уйғурларға қаритилған диний чәклимиләр барғанчә күчәйтилгән болуп, бу әһвал хәлқара мәтбуатларниң диққитини қозғиған иди. Болупму қәшқәр вә хотәндики бир қисим сода сарайлири, банка вә һөкүмәт идарилиригә чапланған, диний йосунда кийингән, йүзини ориған аялларни, сақал қойған әрләрни сода сарайлириға киргүзмәйдиғанлиқи, уларниң мулазимити беҗирилмәйдиғанлиқи һәққидики уқтурушлар һәмдә бәзи наһийиләрдә төвән капаләтлик аилиликләргә берилидиған ярдәм пули қатарлиқларда бу аилиләрдә диний түс алған кийим кийгәнләрниң болмаслиқи шәрт қилинғанлиқи қатарлиқ уқтурушлар һәққидики сүрәтлик хәвәрләр аммиви тор бекәтлиригә йоллинип, уйғурға қаритилған диний чәклимиләр һәққидики хәвәрләр әркин асия радиоси, германийә авази қатарлиқ ғәрб мәтбуатлири вә түркийә мәтбуатлирида берилгәндин кейин, бу әһвал хәлқарада күчлүк инкас қозғиған иди.

Хитай компартийисиниң 18-қурултийиға қатнишиватқан қәшқәр вилайәтлик сақчи идарисиниң муавин башлиқи күрәш кәнҗи 13-ноябир күни“җәнубий җуңго сәһәр почтиси” ниң зияритини қобул қилғинида, хитай һөкүмитиниң уйғурларға қаратқан диний чәкләш сиясәтлирини ақлап, уйғурларниң диний йосунда кийинишигә чәк қоюлмиғанлиқини билдүргән болсиму, лекин у бу йил киргәндин буян қәшқәр вә хотән қатарлиқ җайларда йолға қоюлған диний йосунда кийингән, йүзини ориған аялларни, сақал қойған әрләрни сода сарайлириға киргүзмәйдиғанлиқи, деһқанларға берилидиған ярдәм пули мәсилисидә диний етиқад адәтлиригә чәклимә қоюлғанлиқи һәққидә уқтуруш қилинғанлиқи қатарлиқ әһвалларни тилға алмиған иди.