Wang léchu'enning Uyghur élining hoquqidin chüshüshi chet'ellerde inkas qozghidi

Xitay kompartiyisi merkiziy komitéti Uyghur aptonom rayonida 16 yildin buyan eng aliy hoquq sürüp kelgen, aptonom rayonluq partiye komitétining sékrétari wang léchu'enni wezipisidin qaldurghandin kéyin, bu xewer chet'ellerdiki metbu'atlardin orun aldi shuningdek bir qisim inkaslar meydan'gha chiqti.
Muxbirimiz ümüdwar
2010.04.25

Xitay tilida tarqitilidighan "boshün" torida élan qilin'ghan xitay aptorliri yazghan inkas maqalilirining biride wang léchu'enning shinjangdiki 16 yilliq hökümranliq dewride peqet Uyghurlarningla emes, hetta xenzularningmu nepritige uchrighanliqi, uning " üch xil küchke" zerbe bérish sho'ari astida zorawanliq wasitisi qollinish netijiside milletler ara öchmenlik we ayrimichiliq küchiyip ketkenliki otturigha qoyulidu.

Amérika awazining xitay tili bölümi 25 - april küni élan qilghan maqalide merkiziy komitétning wang léchu'enni xizmitidin qaldurup, uning ornigha xunen ölkilik partiye komitétining sékrétari jang chünshenni sékritarliq wezipisige qoyushining, béyjingning Uyghurlarni asas qilghan shinjang rayonigha nisbeten mötidil we yumshaq siyaset yürgüzüsh yoligha mangghanliqini körsitidighanliqi otturigha qoyulghan.

Xitay inkaschiliri, wang léchu'enni qattiq qol siyaset yürgüzgüchi, jang chünshenni mötidil yol tutquchi, dep perez qilishqan. Emma, dunya Uyghur qurultiyining bayanatchisi dilshat rishit, b b s we amérika awazi qatarliq metbu'atlargha bergen bayanatida xitay merkiziy hökümitining bashliqlarni yötkisimu, ularning ezeldin basturush siyasitini özgertmigenliki, Uyghur millitining menpe'etlirining haman zerbige uchraydighanliqini ilgiri sürgen.

Minpaw gézitidiki analizda bolsa, wang léchu'enning wezipisidin qaldurulushi bilen nur bekri qatarliq bashqa bir qisim emeldarlarningmu ornidin qaldurulush mumkinliki perez qilin'ghan.

Ötken yili, 9 - ayda ürümchide ötküzülgen xitaylarning namayishida wang léchu'enni texttin chüshürüsh sho'ari towlan'ghan, arqidinla ürümchi sheherlik partkom sékrétari li ji wezipisidin qaldurulghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.