Ürümchi sheherlik ottura xelq sot mehkimiside sot jeryanini ün we sin'gha élish yolgha qoyulghan

Shinjang xewer torining bügünki xewiridin qarighanda, bu tüzüm ürümchi sheherlik ottura xelq sot mehkimiside mushu ayning 1 ‏-künidin bashlap resmiy yolgha qoyulushqa bashlighan. Mezkur mehkimining 43 sotxanisining hemmisige ün-sin üsküniliri orunlashturulup bolghan. Tüzüm boyiche sot jeryani ün we sin'ge élinip optikiliq diskigha köchürülgendin kéyin arxipqa qoyulghan. Xewerde bildürülüshiche, mezkur tüzümning ghayisi, dewager ottura sotning hökümige naraziliq bildürüp, aliy sotqa erz sun'ghanda, ottura sottiki jeryanning toghra we toluq halda qayta qarap chiqilishigha kapaletlik qilish üchündur.

Xitayning bu tüzümge alaqidar xewerliride, sot jeryanini ün-sin'ge élish tüzümining siyasiy délolardimu yolgha qoyulidighan- qoyulmaydighanliqi bildürülmigen. Adette xitay qanun organliri milliy we siyasiy mesililerge chétishliq délolarda her waqit qanunda békitilgen ölchemlerni bir chetke qayrip qoyup, höjjette belgilen'gen ölchemlerge asasen ish tutmaqta. Eger ün-sin'ge élish we arxip qaldurush tüzümi siyasiy délolar üchünmu yolgha qoyulghan teqdirde, Uyghur rayonida bügün mutleq köp sandiki siyasiy mehbuslar duch kéliwatqan uwalchiliqlarning kelgüside hésab-soraqsiz qalmasliqi üchün paydiliq dep qaralmaqta.