Xitayning mu'awin dölet bixeterlik ministirining bir yardemchisi amérikigha jasusluq qilish bilen eyiblinip qolgha élin'ghan

Roytérs axbarat agéntliqining ashkarilishiche, amérika bilen xitay mezkur mesile ikki dölet arisida yene krizis keltürüp chiqirishidin ensirep, bu weqeni mexpiy tutqan. Xewerde mu'awin dölet bixeterlik ministiri we uning amérikigha jasusluq qilip qolgha élin'ghan yardemchisining ismi ashkarilanmighan bolsimu, biraq bu yardemchining bir qanche yildin buyan amérika merkizi istixbarat idarisige xitayning chet'eldiki jasusluq pa'aliyitige da'ir nurghun uchurlarni yollighanliqi ilgiri sürülgen.

Roytérs agéntliqining bildürüshiche, weziyettin xewerdar 3 uchur menbesi mezkur ministir yardemchisining amérika merkizi istixbarat idarisini “Siyasiy, iqtisadi we istratégiyilik istixbarat bilen teminligen” liki we uning bu yil 1‏-aydin 3‏-ayghiche bolghan ariliqtiki melum bir küni qolgha élin'ghanliqini bildürgen. Ismini ashkarilashni xalimaydighan xewer menbelirining ilgiri sürüshiche, mezkur yardemchining jasusluq pa'aliyiti xitaygha “Zor buzghunchiliq salghan.”

Közetküchilerning bildürüshiche, mezkur jasusluq weqesi xitay j x ministirliqi tashqi ishlar idarisining bashliqi yü chyangshéngning 1985‏-yili amérikigha qéchip kétish weqesidin buyan yüz bergen eng éghir jasusluq setchilikliridin biri iken. Yü chyangshéng amérikigha qéchip bérip, amérika merkizi istixbarat idarisining xitay irqidin bolghan bir analizchisining uzun yilliq xitay jasusi ikenlikini pash qilghan. Pash qilin'ghan mezkur xitay jasusi eyni chaghda pénsiyige chiqip ketken idi. Kéyin u türmide özini öltürüwalghan.