Хитай сүт парашуки тәркивидики меламин миқдариға өлчәм бәлгилиди

Сәһийә министирлиқиниң билдүрүшичә, сүт парашуки мәһсулатлирини меламиндин тамамән халий қилиш мумкин әмәс, чүнки у сүт парашуки қачиланған пиластик халтидинму сиңип кириш хусусийитигә игә. Шуңа хитай сәһийә министирлиқи сүт парашукида байқалса йол қоюшқа болидиған меламин миқдариниң әң юқири чекини бәлгилигән. Бәлгилимә буйичә, һәр бир килограм сүт парашокидики меламин миқдари бир миллиграм, нормал сүттикиси болса 5.2 Миллиграмдин ешип кәтмәслики керәк.

Хитай сәһийә министирлиқи юқириқи өлчәм билән бир қатарда, сүпәт тәкшүрүш түзүмлирини күчәйткәнликини билдүргән. Әмма көзәткүчиләр сүт парашуки мәсилисиниң өлчәм бәлгиләш билән түзәлмәйдиғанлиқини, әксичә өлчәмни назарәт қилғучиларниң мәсулийәтчанлиқида өзгириш болуши керәкликини, буниң үчүн хитайниң сиясий түзүлмә ислаһатиға муһтаҗ икәнликини билдүрүшмәктә.

Мәзкур ахбарат елан қилиш йиғинида мухбирлар сәһийә министирлиқидин, сүт парашукида зиянкәшликкә учриғанларниң нөвәттики сани һәққидә мәлумат сориған, әмма министирлиқ җаваб беришни рәт қилған. Мутәхәссисләр, байқалған зиянкәшликкә учриғучиларниң 130миңдин ашқанлиқини оттуриға қоймақта. Хитай бу йеңи бәлгилимисини елан қилған бу күндә венгирийә, русийә, филиппин қатарлиқ дөләтләрдә хитайдин импорт қилинған башқа йемәклик мәһсулатлиридинму меламин тәркиви байқалған.

Нөвәттә дуняда хитай йемәклик мәһсулатлириға қарита кәң - көләмлик импорт чәклимиси йолға қоюлмақта. Һиндонезийә йолға қойған йеңи бәлгилимә буйичә, хитайдин сүт парашуки импорт қилғанларға еғир җәриманә қоюлғандин башқа,икки йиллиқ қамақ җазаси берилиду.

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар