Bu yil yene 10 ming xitay aliy mektep oqughuchisi Uyghur we tibet rayonlirida ishqa orunlashturulmaqchi

Bu pilan seyshenbe küni béyjingda échilghan “Pida'iylarni gherbiy rayonda xizmet qilishqa seperwer qilish xizmet yighini” da otturigha qoyulghan.

Xitay xelq'ara radi'osidin bérilgen xewerdin melum bolushiche, xitay hökümiti xitay yashlirini gherbiy rayonda xizmet qilishqa qiziqturush üchün ulargha dölettin bérilidighan yardemning miqdarini östürüp, shara'itlirini yaxshilaydiken.

“Pida'iylar” dep atalghan bu xitay yashliri Uyghur we tibet rayonida asasiy ma'arip, yéza igilik téxnikisi, sehiye saheliride xizmet qilidiken. Uyghur rayonida ishqa orunlashturulidighan xitay yashlirini tizimlash xizmiti 19-aprél küni resmiy bashlan'ghan.

Xitay da'iriliri ilgiri yillardimu oxshash usulda Uyghur rayonigha nurghun xitay köchmen yötkigen idi.

Uyghur rayonida aliy mektep püttürgen yashlar ish tapalmay ishsiz qéliwatqan shundaqla “Qayta terbiyilinish” üchün xitay ölkilirige ewetiliwatqan shara'itta xitay köchmenlirining herxil nam astida Uyghur rayonida ishqa orunlashturulushi rayondiki milliy ziddiyetni kücheytiwatqan muhim amillarning biri idi.

Emma xitay da'iriliri 5-iyul weqesidin kéyin mezkur siyasitini téximu ilgiriligen halda élip barmaqta. Xitayning soxu tor bétining xewer qilishiche, 20-aprél küni herqaysi aliy bilim yurtlirini püttürgen 100din artuq toqsunluq yash xitayning xunen ölkisidiki lyéju téxnika mektipige ewetilgen.