Sichüendiki yer tewreshte perzentliri ölgen ata - anilarning erzi ret qilindi

Erz fushin bazarliq hökümiti, fushin ikkinchi bashlan'ghuch mektipining mudiri, myenju sheherlik ma'arip we qurulush idarisi üstidin bolup, bu orun we shexislerning apetke uchrighanlar a'ile - tawabi'atidin ashkara epu sorishi we tölem tölep bérishi telep qilin'ghan idi.

Bügün birleshme axbarat agéntliqining béyjingdin xewer qilishiche, déyang ottura sot mehkimisi, erizdarlarning erzige qarap chiqishni ret qilghan. Xewerde bildürülishiche, sot xadimliridin biri erizdarlargha, merkizi hökümetning bu xil délolarni qobul qilmasliq heqqide ichki höjjiti barliqini bildürgen.

Bu yil 5 ‏ - ayda 70 mingdin artuq kishining ölümige seweb bolghan sichüendiki yer tewresh weqeside eng chong ziyankeshlikke uchrighuchilar mektep oqughuchiliri bolghan. Chünki apet mezgilide apet rayonidiki hökümet binaliri saq qélip mektep binaliri asasen dégidek örülüp tügigen. Eyni waqitta hökümet mektepning qurulush matériyallirida süpet ölchimi yétersizliki bolghanliqini ten alghan we weqede mes'uliyiti barlarni jazalaydighanliqini bildürgen bolsimu, bügünki qeder bu heqte héchqandaq qedem bésilmighan. Bu sewebtin apet rayonidiki ata - anilardin 60 kishi mezkur erzni sun'ghan.

Erzdarlarning birleshme agéntliqigha bildürüshiche, yerlik emeldarlar bezide tehdit, bezide pul arqiliq aldash yoli bilen erizdarlarni erzidin waz kéchishke qistimaqta. Emma sang pemililik bir erizdar özlirining dewadin waz kechmeydighanliqini we yuqiri sotqa eriz sunidighanliqini bildürgen.