Хитайда зәһәрлик чекимлик әткәсчилики билән әйибләнгән 4 нәпәр пакистанлиқ вә афғанистанлиққа өлүм җазаси берилиши мумкин

Җүмә күнки хәвәрләрдә хитайниң шенҗин таможна даирилири тәрипидин зәһәрлик чекимлик әткәсчилики билән әйиблинип қолға елинған 2 нәпәр пакистан пуқраси билән 2 афғанниң өлүм җазасиға һөкүм қилиниш еһтимали барлиқи билдүрүлди.
Мухбиримиз әркин
2010-01-01
Share

Бу һәқтики хәвәрләрдә, юқириқи 4 нәпәр пакистанлиқ вә афғанниң йеқинда 5.144 Килограм хероин билән шенҗен таможнисида қолға чүшкәнлики, бу хитай таможна даирилири йеқинқи бир қанчә йилдин бери паш қилған миқдари әң көп хероин әткәсчилики болуп һесаблинидиғанлиқи билдүрүлгән.

Хитай мәтбуатлириниң хәвәр қилишичә, хитай таможна даирилири өткән йили пакистандин шинҗенға йолланған 2 вагон малниң ичидә хероин барлиқиға даир ахбарат тапшурувалған болуп, сақчилар бу учурға асасән вагондики 5.144 Килограм хероинни байқиған шундақла 9 ‏ - айда хитай тәвәликидики бир аялниң һәмраһлиқида мални тапшурувалғили кәлгән чәтәлликни қолға алған. Мәзкур делоға четилип қолға елинғанларниң сани җәмий 9 нәпәр болуп, уларниң ичидики 2 пакистанлиқ, 2 афғанни өз ичигә алған 4 киши чәтәллик иди.

Бу вәқә 2007 ‏ - йили үрүмчидә 4 килограм хероин билән тутулуп қелип, өлүм җазаси берилгән һинди қан системисидики әнглийилик акмәл шайикниң өлүм җазаси иҗра қилинип 2 күндин кейин елан қилинди. Әнглийә хитайни акмәлниң мәсилисидә "кишилик һоқуқниң асаси принсипини дәпсәндә қилиш" билән әйиблигән.

Франсийә агентлиқи бу һәқтики хәвиридә, хитай һөкүмитидики вәзийәттин хәвәрдар шәхсләрниң сөзини нәқил кәлтүрүп, 2004 ‏ - йилдин башлап хитайға киридиған хероинниң келиш мәнбәси алтун уч бурҗәк районидин афғанистанға йөткәлгәнликини, афғанистанда ишләпчиқирилған хероинниң ичкиридики гуаңҗу, шенҗен, шаңхәйләрдә сетилипла қалмай, үрүмчи, чуңчиң вә чеңдулардиму сетиливатқанлиқини илгири сүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт