Xongkongda on mingdin artuq kishi namayish qilip xongkong waliysining istépa qilishini telep qildi

Yéngi yilning birinchi küni ötküzülgen namayishta kishiler qollirigha xongkong waliysi adem qéni ichidighan mexluqqa we börige oxshitip sizilghan resimlik lozonkilarni kötürüp turup namayish qilghan we “Xongkong xelqi öz waliysini özi saylap chiqishi kérek”, dep sho'ar towlighan.

Lyang jéngying xitay merkizi hökümitining qollishigha érishken kishi bolup, u téxi yérim yil awwalla xongkong waliliyliqigha teyinlen'gen idi. Fransiye agéntliqining xewer qilishiche, u wezipige olturghandin buyan xongkong xelqining uninggha bolghan ishenchi izchil töwenlep barghan. Ular uning semimiyitidin gumanlinidiken we u wezipige olturghandin béri xelq turmushining nacharlap, ijtima'iy, siyasiy hoquqlirining chékinip ketkenlkige ishinidiken.

13 Mingdin artuq namayishchining qatnashqanliqi texmin qiliniwatqan bu namayish jeryanida xitay merkizi hökümitige naraziliq bildürülgen sho'arlar towlan'ghan. Kishiler xitay hökümitidin xongkong xelqining saylash hoquqini qayturup bérishni telep qilghan. Namayish jeryanida yene xongkong en'gliyige tewe waqitta ishletken bayraqlarning échilghanliqi melum. 1-Yanwar küni xongkong saqchi da'iriliri 62 yashliq bir kishini buzup-yirtilghan bir xitay dölet bayriqini kötürüwalghanliqi üchün qolgha alghanliqini bildürgen.

Igilinishiche, bügünki namayishni kontrol astigha élish üchün xongkong da'iriliri 1000 din artuq saqchini yötkep barghan.