Xu jintaw xongkong ziyaritide xelqning keng kölemlik naraziliq namayishigha duch kélishi mumkin

Biraq axbarat wasitilirining xewer qilishiche, xongkong xelqi 1‏-iyul yekshenbe küni parixorluq, kishilik hoquq we iqtisadiy kirim perqining chongiyip kétishi qatarliq mesililerge naraziliq bildürüp, keng kölemlik naraziliq namayishi ötküzidiken.

Xewerlerde, namayishning xongkongda parlamént saylimi élip bérish, xongkong rehbirini saylam arqiliq saylash, axbarat erkinliki, parixorluqqa qarshi turush qatarliq teleplerni otturigha qoyupla qalmay, xitay chong quruqluqidiki kishilik hoquq we öktichi zatlargha qaritilghan parakendichilik qilmishlirigha naraziliq bildüridighanliqi ilgiri sürülgen.

Béyjingning xongkongdiki saylamgha tesir körsitip, lyang jingyingning saylinishigha türtke bolghanliqi naraziliq qozghighan idi. 6-Ayning bashliri nechche ming xongkongluq namayish qilip, xitay emgek hoquqi pa'aliyetchisi li wangyangning ölüsh sewebini tekshürüshni telep qilghan. Li wangyang 20 yil türmide yétip, ötken yili qoyup bérilgendin kéyin, yéqinda uning özini ésip ölüwalghanliqi élan qilin'ghan. Biraq xunenlik mezkur kishilik hoquq pa'aliyetchisining ölümi xongkongluqlarning gumanini qozghighan idi.

Xitay hökümiti 2047-yilgha qeder xongkongning aliy aptonomiyilik hoquqi we gherb démokratiye istilidiki turmush usuligha arilashmasliqqa, 2017‏-yili xongkong walisini saylam arqiliq saylashqa, 2020-yili parlamént saylimi élip bérishqa wede qilghan bolsimu, biraq hazirgha qeder héchqandaq konkrét pilan otturigha qoyup baqmighan. Bu nurghun xongkongluqlarni bi'aram qilip, ularning naraziliqini qozghighan idi.