Yawro-asiya yermenkisi ürümchidiki ghayiblar a'ile-tawabi'atlirigha bi'aramchiliq élip keldi
2012.09.03
Ghayiblardin abduréhim sidiqning ayali ayshe, muxter mexetning ayali tuqiz we yüsüp turghunning anisi qurban'güllerning radi'omizgha ashkarilishiche, 2-séntebirdin bashlap, ularning bosughisigha 5 neperdin nazaretchi qoyulghan we bu nazaretchiler ularni künde 3 qétim nöwet almiship 24 sa'et nazaret qilghan. Nazaretchiler mezkur a'ile ezalirini herqandaq yerge, hetta magizin'gha bérip soda qilishqa öz aldigha bérishigha yol qoymighan؛ nazaretchiler ularni herqandaq yerge aptomobil bilen élip barghan we ularning ishi tügigiche nazaretchiler sirtta kütüp turghan.
Mezkur a'ililerge xuddi jinayet gumandarigha oxshash mu'amile qilinishi, ularning normal turmush we rohiy keypiyatigha éghir tesir yetküzgen. A'ililer bu xil teqib qilinishqa naraziliq bildürgen. Bezi nazaretchiler dölet bixeterlikidin söz échip tehdit salsa, yene beziliri özlirining charisiz wezipe ijra qiliwatqanliqini bildürgen.
Xitay da'iriliri, yawro-asiya yermenkisi harpisida ürümchidiki köchme nopustiki Uyghurlargha qarita tazilash élip bérip, xeterlik dep qaralghan bir qisim Uyghurlarni ürümchidin heydigen yaki qisqa waqit ichide ayrilishqa buyrughan idi. Ürümchidin heydeshke qattiq mejburlan'ghanlar 5-iyuldin kéyinki ghayiblar a'ile-tawabi'atliri bolup, bu ehwaldin, xitay da'irilirining ghayiblar mesilisining yawro-asiya yermenkisige kelgen chet'ellik méhmanlarning diqqitini tartip qélishidin qattiq ensirewatqanliqi melum bolmaqta.