Kent sékritari: "'qoshmaq tughqan' lirimiz özining kimlik melumatlirini bizdin yoshuridu"

Muxbirimiz shöhret hoshur
2019-11-13
Élxet
Pikir
Share
Print
Lagér shahiti zumret dawut "Qoshmaq tughqan" liri bilen. 2018-Yili. Ürümchi.
Lagér shahiti zumret dawut "Qoshmaq tughqan" liri bilen. 2018-Yili. Ürümchi.
Zumret Dawut Teminligen.

Muxbirimiz xitayning "Qoshmaq tughqan" siyasitining ijra'atlirini éniqlishi dawamida atalmish "Qoshmaq tughqan" lardin xitay terepning öz kimlik melumatlirini qarshi tereptin yoshuridighanliqi ashkarilandi. Xotendiki bir kent amanliq mudiri özini ikki yildin buyan yoqlap turuwatqan xitay tughqinining peqetla ismini bilidighanliqi, emma nede ishleydighanliqi, néme ish qilidighanliqini bilmeydighanliqini bayan qildi. Uyghur rayonidin yéqinda chiqqan lagér shahiti zumret dawutmu ahaliler kométitining Uyghurlarni "Qoshmaq tughqan" lirining kimlik melumatlirini sorimasliq heqqide agahlanduridighanliqini tekitlidi.

Hörmetlik radiyo anglighuchilar, Uyghur rayonida ijra qiliniwatqan xitayning "Qoshmaq tughqan" siyasitining ghelite terepliri köplep ashkarilanmaqta. Melum bolushiche, milletler öz'ara chüshinish we ittipaqliqni kücheytishni meqset qilghanliqi ilgiri sürülgen atalmish "Qoshmaq tughqan" lardin xitay terep özlirining kimlik melumatlirini Uyghur tughqinidin mexpiy tutudiken. Shundaq bolghachqa xotendiki melum bir kent sékritari özini 2 yildin buyan yoqlap turuwatqan xitay terepning nede ishleydighanliqini ta hazirghiche bilelmigen.

Bu tughqandarchiliqta xitay terepke Uyghur ahalilerning 7 ewladighiche kimlikini xatirilesh, öyige kélip-kétiwatqan barliq méhmanlirini tizimlash؛ ularning kallisida néme oylap néme xiyal qiliwatqanliqini bilish hoquqi bérilgen؛ emma Uyghur terepke xitay tughqinining nede ishleydighanliqini bilish hoquqimu bérilmigen. Uyghur ahalilirining öyige ushtumtut bésip kélip "Tughqan yoqlash" heqqi bolghan xitay "Tughqan" lar qarshi terepke özining esli yurti we a'ile ehwali heqqide melumat bérish mes'uliyitini hés qilmighan. 

Yéqinda Uyghur rayonidin chiqqan lagér shahiti zumret dawutmu Uyghurlarning atalmish "Qoshmaq tughqan" lirining kimlikini bilmeydighanliqini bayan qildi. "Qoshmaq tughqan" lardin Uyghur terepning peqetla gep anglash mejburiyiti barliqi, qarshi tereptin so'al sorash, bolupmu kimlik melumatlirini sorash heqqi yoqluqini tilgha alghan zumret dawut ahaliler kométitining "Qoshmaq tughqan" lar ziyaretke kélishtin burun Uyghur ahalilerni ziyaret dawamida qarshi terepning kimlik melumatlirini sorimasliq heqqide agahlanduridighanliqini ashkarilidi.
Xitay "Qoshmaq tughqan" larning Uyghurlar bilen gerche tamaqta, yataqta we ishta bille bolup turupmu, yeni juwawini bille tügüp yewatqan, leghmenni teng sozuwatqan waqtidimu öz bixterlikidin endishe qilidighanliqi, bu endishining yalghuz shu "Qoshmaq tughqan" lardila emes, bu sehnini hazirliwatqan xitay da'iriliridimu mewjutluqi perez qilinmaqta.

Toluq bet