D u q qatarliq bir qisim ammiwi teshkilatlar Uyghurlargha "Qurbanliq" tarqatti

Ixtiyariy muxbirimiz erkin tarim
2020-08-05
Élxet
Pikir
Share
Print

Korona wirusi tarqalghandin kéyin kélip chiqqan iqtisadiy krizis, karantin, ish we soda orunlirining toxtishi qatarliq türlük seweblerdin xuddi dunyaning köp elliridikige oxshashla türkiye we bir qisim ottura asiya elliridiki Uyghurlarmu iqtisadiy hem turmush jehettin qiyin ehwallarda qalmaqta. Bu sewebtin qurbanliq qilalmighan Uyghurlarning sanimu köpeygen. Bundaq éghir bir peytte d u q bashliq her qaysi döletlerdiki sherqiy türkistan ammiwi teshkilatliri qurbanliq qilalmighan Uyghurlarnimu untumidi.

D u q yawropa döletliridiki türk we bezi musulman döletlerning ammiwi teshkilatliri teqdim qilghan qurbanliq i'anilirini türkiye, ottura asiya türkiy jumhuriyetliri, pakistan, tayland we hindistan qatarliq döletlerdiki 252 Uyghur a'ilisige ewetip bergen.

D u q re'isi dolqun eysa ependi aldi bilen pütün dunyadiki barliq Uyghurlarning qurban héytini tebrikligendin kéyin bu qétimqi qurbanliq yardem pa'aliyitining meqsiti toghrisida toxtaldi.

"Wirus krizisi yardem merkizi" mes'uli, d u q diniy ishlar komitéti mudiri turghunjan alawuddin ependi so'alimizgha jawab bérip, d u q gerche siyasiy teshkilat bolsimu qurulghandin tartip türk, Uyghur, ereb we bashqa musulman xelqlerdin yighqan i'anilerni dunyaning herqaysi jaylirida qiyin ehwalda qalghan Uyghurlargha tarqitip kéliwatqanliqini bildürdi.

Turghunjan alawuddin ependi bu yil d u q qanche a'ilige qurbanliq yardem qildi? dégen so'alimizgha u, mundaq jawab berdi: "Bu yil Uyghur we türk qérindashlardin 252 kishilik qurbanliq i'anisi yighip, bu qurbanliqlarni ewettuq: mesilen: qazaqistan'gha 50, qirghizistan'gha 50, özbékistan'gha 10, pakistan'gha 15, taylandqa 15, misirgha 7, afghanistan'gha 3 qurbanliq i'anisi ewetildi. Bulardin sirt türkiyening bursa, qahramanmarash we istanbul qatarliq sheherlerde qiyin ehwalda qalghan yétim-yésir we oqughuchi balilargha bolup jem'iy 102 kishige qurbanliq ewetip bérildi. Biz bu qurbanliqlarning pulini türkiyediki bezi weqip we teshkilatlargha ewetip berduq, ular d u q namidin bu qurbanliqlarni tarqitip berdi".

Pakistandiki ömer Uyghur weqpi re'isi ömer Uyghur ependi korona wirusi peyda bolghandin kéyinki mezkur tunji qurban héyitida pakistandiki Uyghurlarning 65% ing qurbanliq qilalmighanliqini, bundaq bir peytte bu yardemning ehmiyitining zor bolghanliqini bayan qildi.

Türkiyening istanbul shehiride pa'aliyet élip bériwatqan "Kök ay insaniy yardem teshkilati" mu bu qurban héyitta tul xotun, yétim-yésir, yashinip qalghan, késelchan we ige-chaqisiz kishilerdin terkib tapqan 2000 etrapida a'ilige qurbanliq göshi tarqitip bergen. Mezkur teshkilatning re'isi abduréhim eziz'oghli ependi dunyaning her qaysi jayliridiki Uyghur teshkilatliri, türkiyediki türk teshkilatliri we bezi kishiler i'ane qilghan 50 kala, 650 qurbanliq qoyni soyup tarqitip bergenlikini bildürdi.

Bulardin bashqa türkiyediki bezi sherqiy türkistan fondliri we teshkilatlirimu qurbanliq göshi tarqatqan.

D u q ning istanbulda turushluq wekili abduréshit abdulxemit ependi türkiyening bursa, qahramanmarash we istanbul shehiride turuwatqan a'ililer we oqughuchilargha 102 qurbanliqning pulini ewetip qurbanliq qoy soydurup tarqatqanliqini bayan qildi.

Bu yil 3-ayning 26-küni dunyaning her qaysi döletliride pa'aliyet élip bériwatqan 40 tin artuq Uyghur teshkilatining mes'ulliri téléfon yighinigha ishtirak qilip, d u q ning yétekchilikide "Wirus krizisi yardem merkizi" qurghanidi. Mezkur merkez dunyaning herqaysi jayliridiki Uyghurlardin 160 ming dollar pul i'ane toplap tarqatqanidi.

Toluq bet