Ataqliq naxshichi reshide dawutning bir mehel lagérda yatqandin kéyin késiwétilgenliki ashkarilandi

Muxbirimiz shöhret hoshur
2020-03-18
Élxet
Pikir
Share
Print
Ataqliq naxshichi reshide dawut.
Ataqliq naxshichi reshide dawut.
Photo: RFA

Weziyettin xewerdar kishilerdin biri 3 ayning aldida radiyomizgha inkas yollap, ataqliq naxshichi reshide dawutning bir mezgil lagérda yatqandin kéyin, mexpiy sot échilip késiwétilgenlikini melum qilghanidi. Muxbirimizning shuningdin buyanqi éniqlashliri dawamida, reshide dawutning ürümchi sheherlik ottura sot mehkimisi teripidin qamaq jazasigha höküm qilin'ghanliqi delillendi.

Hörmetlik radi'o anglighuchilar, mana bu lirik naxshilarning orundighuchisi, hörmetke sazawer naxshichi reshide dawutning sehnidin-el qoynidin ayriwétilip lagérgha ekétilgenliki, 2 yildin buyanqi jem'iyet xewerliride keng tarqalghanidi. Birqanche ayning aldidiki bir ijtima'iy axbarat xewiride, uning muddetsiz qamaqqa höküm qilin'ghanliqi tilgha élin'ghan. Yéqinda ürümchi weziyitidin xewerdar kishilerdin biri radiyomizgha uchur yollap, reshide dawutning ötken yilning axiri ürümchide échilghan bir mexpiy sotta bölgünchilik bilen eyiblen'genliki we 15 yilliq késiwétilgenlikini melum qildi. Téléfonimizni qobul qilghan Uyghur aptonom rayonluq naxsha-usul ömikining bir sabiq xadimi, reshide dawutning késiwétilgenlikidin xewiri barliqi, emma bashqa ehwalidin melumati yoqluqini éytti.

Weziyettin xewerdar kishining inkasida reshide dawutning tutulushi we késilishide uning jem'iyettiki tesiri yeni izzet-hörmitining asasliq seweb bolghanliqi tekitlen'gen we lagér tutqunliri arisida Uyghur jem'iyitide her qaysi sahelerde bash kötürgen serkilerning muhim bir qismini teshkil qilidighanliqi eskertilgen. Inkasta yene sot hökümining edebiyat-sen'et sahesidiki az bir qisim idare we bölüm bashliqlirigha uqturulghanliqi bayan qilin'ghan. Shunga biz bu heqte uchur élish üchün ürümchidiki medeniyet we edebiyat-sen'et sahesidiki idare-jem'iyetlerge téléfon qilduq. Ürümchidiki "Bingtüen" ( ishlepchiqirish qurulush armiyesi) naxsha-usul we opéra ömikining bir mudiri, bu ömektin lagérgha ekétilgen sen'etchilerning kim ikenlikini sorighinimizda, u bu ömekte lagérgha ekétilgen birmu kishi yoqluqini éytti. Biz uningdin yéqinda késiwétilgen, idare we bölüm bashliqlirigha uqturulghan sen'etkarning kim ikenlikini sorighinimizda uning reshide dawut ikenlikini ashkarilidi. U reshide dawutning késilgenlikini éniq bilidighanliqini tekitlesh bilen birlikte, uning késim mudditidin xewersizliki éytti. U özining reshide dawut bilen bir ömekte emeslikini eskertip, bu ehwal heqqide aptonom rayonluq opéradin melumat élishimizni tewsiye qildi.

Biz uningdin, reshide dawutning késiwétilgenliki uqturulghan shu yighinda, sen'et sahesidin yene kimlerning barliqini sorighinimizda, u mezkur bingtüen sen'et ömikining usul etritining bashliqi maynur dégen ayalning barliqini éytti. Usul etriti bashliqi maynurning téléfoni élinmighandin kéyin, biz ürümchidiki alaqidar sot orunlirigha téléfon qilduq.

Weziyettin xewerdar kishi reshide dawut üstidiki sot hökümining ürümchi ottura sot mehkimisi teripidin chiqirilghanliqini éytqanidi. Téléfonimizni qobul qilghan ürümchidiki bir rayonluq saqchi xadimi, hökümning ürümchi sheherlik ottura sot teripidin chiqirilghanliqini delillidi. Bu xadim, reshide dawutning késilish sewebi heqqide melumat bérelmeydighanliqi, chünki déloning siyasiy bir délo ikenlikini eskertti.

Hörmetlik radi'o anglighuchilar, hazirghiche bolghan éniqlashlirimizdin ataqliq sen'etkar reshide dawutning ürümchi ottura sot mehkimisi teripidin késiwétilgenliki aydinglashti, emma késilgen yil mudditi téxi aydinglashmidi.

Yuqiridiki awaz ulinishidin tepsilatini anglighaysiler.

Toluq bet