Washin'gton shehiride “Uyghurlarning pighani” namliq resim körgezmisi échildi

Uyghur siyasiy pa'aliyetchi roshen abbas xanim özi biwasite küch chiqirip, washin'gton shehiridiki döletlik axbarat kulubida ötküzgen resim körgezmisidin körünüsh. 2019-Yili 14-mart.

Ikkinchi dunya urushi mezgilidiki yehudiylarning zor kölemde qirghin'gha uchrash paji'esi heqqide köp qétimlap éytilghan “Emdi qaytilanmisun!” sho'arining 21-esirge kelgende Uyghurlargha tetbiqlinishi nöwettiki Uyghurlar mesilisining eng ixcham teswiri bolup qéliwatqanliqi melum. Uyghur jem'iyiti duch kéliwatqan eng paji'elik tarixiy krizisning nöwettiki ré'al ehwalini amérikidiki téximu köp sahe kishilirige bildürüsh üchün 14-mart küni amérikidiki Uyghur siyasiy pa'aliyetchi rushen abbasning biwasite küch chiqirishi bilen washin'gton shehiridiki döletlik axbarat kulubida “Uyghurlarning pighani: jaza lagérliri qaytidin otturigha chiqmaqta!” témisidiki resim körgezmisi échildi.

Bu qétimqi resimler körgezmiside Uyghur diyaridiki siyasiy basturushning ehwali Uyghur serxillirining tutqun qilinishi, qaranchuqsiz qalghan Uyghur sebiylirining sersanchiliqi, himayisiz qalghan Uyghur ayallirining mejburiy yosunda xitay köchmenliri bilen toylishishi, Uyghur medeniyitini eks ettürgüchi binakarliq we sen'etning weyran qilinishi, xitay armiyesining pütün Uyghur diyarini herbiy ishghaliyet halitide saqlishi qatarliq köpligen heqiqiy resimler arqiliq ixcham we janliq ipadilen'gen idi.

Körgezme heqqidiki bildürgide bu qétimqi resim pa'aliyitining “Bir awaz bir qedem” herikitidin kéyin wujudqa kelgen yene bir qétimliq dunyawi miqyasni közligen pa'aliyet ikenliki, “Uyghurlarning pighani: jaza lagérliri qaytidin otturigha chiqmaqta!” témisidiki bu körgezmining 15 dölettiki 33 sheherde bir-birlep ötküzülidighanliqi, buning tunji qétimliqi bügün washin'gton shehiride ötküzülgenliki éytilidu.

Körgezme bashlan'ghandin tartip washin'gton shehiridiki bir qisim Uyghur jama'iti, shuningdek Uyghurlar mesilisige qiziqquchi amérikaliqlar, amérika hökümitide xizmet qilghuchi bir qisim kishiler arqimu arqidin zalgha kirip, resimlerni zor qiziqish ichide körüp chiqti. Ularning beziliri resimlerdiki menzirilerdin heyranliq hés qilsa, yene beziliri munasiwetlik ehwallar heqqide körgezmini teshkilligüchi roshen abbastin türlük so'allarni soraytti. Shuning bilen bir waqitta herqaysi axbarat wasitilirining muxbirliri bes-beste bügünki körgezme heqqide roshen abbas we bashqa Uyghurlarni ziyaret qilmaqta idi.

Biz körgezme ariliqida bu qétimqi pa'aliyetni teshkilligüchi roshen abbasni ayrim ziyaret qilip, uningdin néme üchün bu qétimqi pa'aliyetni teshkilligenlikini soriduq. U bu heqte jawab bérip, yighinlardiki muhakime sheklidin bashqa resim körgezmisi arqiliq Uyghurlar duch kéliwatqan mesilini téximu janliq eks ettürgili bolidighanliqini tekitlidi.

Bir qisim Uyghur yashlirimu bu qétimqi körgezmining ongushluq échilishigha öz pidakarliqini ayimighan idi. 15 Yilliq muddetlik qamaqqa höküm qilin'ghanliqi ilgiri sürülüwatqan Uyghur edib we ma'aripchi yalqun rozining amérikadiki oghli kamaltürükmu dadisining ehwali we emgekliri eks ettürülgen chong resim taxtisini teyyarlap kelgen idi. Biz uning bilen bu toghriliq sözleshkinimizde kamaltürük dadisi we bashqa barliq Uyghur tutqunliri hörlükke chiqmighuche özining bu yoldin qaytmaydighanliqini bildürdi.

Bu qétimqi resim körgezmisi üchün alahide kaliforniyedin kelgen tomaris almas ayrim ziyaritimizni qobul qilghanda özining bu körgezmige tizilghan resimlerdin xuddi wetende qalghan uruq-tughqanlirining séymasini körgendek boluwatqanliqini, bu jehette muhajirettiki hemmila Uyghurning özige oxshash héssiyatta ikenlikige ishinidighanliqini sözlep ötti.

Melum bolushiche, bu resimler körgezmisi bir-birlep herqaysi döletlerdiki asasliq sheherlerde körsitilidighan bolup, shu arqiliq Uyghurlarning heqiqiy ehwalini téximu köpligen kishilerge bildürüsh nishan qilinmaqta iken.