Ataqliq ressam sabitjanning ijadiyetliri yazliq körgezmide alahide orun aldi

17-Iyun küni qirghizistan paytexti bishkek shehiridiki “Galéréye m” namliq sen'et orginining “Yazliq resimler körgezmisi” bashlandi. Körgezmige qirghizistanning meshhur ijatkarlirining eserliri qoyuldi, ularning qatarida: sabitjan babajanof, alékséy kaménskiy, ta'alay usubaliyéf, zhilikchi zhakipof, momun astar, konstantin shkurpéla, alapay abdiqasimof we bashqilar bar.

Mezkur körgezmining échilish murasimigha qirghizistan ressamlar birleshmisining re'isi ta'alybék usubaliyéf, qirghizistan Uyghurliri “Ittipaq” jem'iyitining re'isi esqer qasimof, “Ittipaq” gézitining muherrirliri, Uyghur jama'itining pa'aliyetchiliri, qirghizistandiki sen'et heweskarliri we birqisim ziyaliylar qatnashti.

Ressamlar birleshmisining re'isi ta'alybék usubaliyéf nutuq sözlep, sabitjan babajanofni janköyer, méhnetkesh we mahir ressam dep atap, uning eserlirini yuqiri bahalidi. Bu körgezmige sabitjan babajanofning köp sandiki ijadiy eserliri qoyulghanidi.

Sabitjan babajanof 1941-yili ghulja shehiride tughulghan. Bowisi salijanbay babajanof sherqiy türkistan milliy inqilabigha qatniship, sherqiy türkistan jumhuriyiti yer-su nazaritining naziri bolup xizmet körsetkenidi. Sabitjan babajanof 1955-yili ata-bowiliri bilen birge qirghizistanning talas oblastigha köchüp chiqip kirof rayonigha orunlashqan.

Sabitjan babajanof bu körgezmige 40 din oshuq yéngi resimlirini teqdim qilghan bolup, u mezkur körgezmidiki alahide orunni igiligen. Ziyaritimizni qobul qilghan sabitjan ependi, öz eserliride wetinini séghinish tuyghulirini teswirlep yash ewladlarni wetenperwerlik rohida terbiyeleshni meqset qilghanliqini bildürdi.

Sabitjan babajanof we uning ijadiyitige öz shé'irlirini béghishlighan rus sha'iri génnadiy smirnof ziyaritimizni qobul qilip, “Sabitjan babajanof öz eserliri bilen Uyghur xelqini ulughlidi” dep éytti. U mundaq dédi : “Méningche u ulugh bir adem, chünki u öz waqtida birinchilerdin bolup chinggiz aytmatofning yazghuchi talantini körüp, uning eserlirini öz resimliride janlandurdi. U yazghuchini ulughlap, eyni waqitta özining wetinini we Uyghur xelqini ulughlidi, biz buni untup qalmasliqimiz kérek. Méning tilikim bölikimizde bundaq kishiler köp bolsiken!”

Adette sabitjan babajanof grafik ressam dep qariliwatqan bolsimu, lékin uning yene may boyaq we bashqa türlerdimu sizish téxnikisi yuqiri hésablinidu.

Uning ijadiyitide tebi'et we weten témiliri muhim rol oynaydu. Mezkur körgezmige qatnashqan arxitéktor we jama'et erbabi enwer hashimof, ziyaritimizni qobul qilip, ressamning eserlirining chongqur menige ige ikenlikini bildürdi.

Sabitjan kamal oghli babajanof qirghizistan jumhuriyitining medeniyitige zor hesse qoshqan shexs. U, 1993-yili qirghizistan jumhuriyitining “Xizmet körsetken ressami” dégen namgha érishken. U hazir qirghizistan ressamlar ittipaqining eng hörmetlik ressamlirining biri bolup qariliwatidu. Uning eserliri moskwa shehiridiki sherq xelqliri dölet muzéyida, qazaqistan, qirghizistan jumhuriyetlirining sen'et muzéylirida shuningdek yene qirghizistan jumhuriyitining tarix muzéyida saqlanmaqta. Uning birqisim resim ijadiyetliri yene gérmaniye, amérika, kanada, italiye, yaponiye, en'gliye we bashqa dölette chiqqan resimler toplamliridin orun alghan.