Reyhan es'et: “Inim ekberni we bashqa milyonlighan insanlarni nabut qilghanlar jawabkarliqqa tartilidighan künler choqum kélidu”

Muxbirimiz irade
2022.01.13
Reyhan es'et: “Inim ekberni we bashqa milyonlighan insanlarni nabut qilghanlar jawabkarliqqa tartilidighan künler choqum kélidu” Reyhan es'et amérikaning her yilda bir ötküzidighan “Démokratiye yuqiri derijilikler yighini” gha tor arqiliq qatnashqan körünüsh. 2921-Yili 8-dékabir.
state.gov

Uyghur tilidiki nuqtiliq xewer we mulahize tor betliridin bolghan “Baghdash” tor sehipisining qurghuchisi, téxnika karxanichisi we saxawetchi ekber es'et xitay hökümiti 2016-2017-yilliridin bashlap rayonda yolgha qoyghan keng kölemlik tutqun qilish we lagérlargha qamash herikitide ziyankeshlikke uchrighan Uyghur ziyaliyliri, karxanichiliri, sen'etkarliri, diniy zatliri qatarliqlarning biri süpitide qolgha élinip 15 yilliq qamaq jazasigha mehkum qilin'ghanidi.

Shundin béri uning amérikadiki hedisi reyhan es'et inisi ekber, lagér we turmilerge solan'ghan bigunah kishilerning hörlükke chiqishi, adaletke érishishi üchün tinimsiz heriket qilmaqta. Inisi ekberning bu yil 5-yanwar künidiki 35 yashqa kirgen tughulghan künini yuqirida siler awazini anglighan tesirlik qisqa filimni ijtima'iy taratqularda tarqitish arqiliq xatiriligen reyhan es'et inisigha “Haman bir küni dunya sen bilen tonushidu, biz hemmimiz birlikte séni öyge qayturup kélimiz” dep wede qilidu.

Reyhan es'et bu munasiwet bilen radiyomizgha qilghan sözide inisining xitay türmisidiki azab-oqubitining bu yilmu dawam qiliwatqanliqidek bu achchiq heqiqetning özini tolimu azablaydighanliqini, bu azabining uning tughulghan künide hessilep ashqanliqini éytti.

Emma reyhanning köngli u künlerde ekber es'etni untup qalmighan dölet erbablirining, pa'aliyetchilerning we bashqa nurghun kishilerning xatire sözliri bilen azraq bolsimu teselli tapqan. Reyhan es'et sözide “Inimning tughulghan küni munasiwiti bilen azab tartiwatqan milyonlighan Uyghurning mesilisi yene bir qétim kishilerning semige sélin'ghan boldi” dédi.

Ekber es'etning tughulghan küni munasiwiti bilen amérika kéngesh palatasi tashqi ishlar komitéti tiwittér arqiliq “Béyjing olimpikige 30 kün qaldi. Biraq xitayning bu yilmu tughulghan künini xitay türmiliride ötküzgen ekber es'et we bashqa nurghunlighan ademlerge qiliwatqan rehimsizlerche ziyankeshliki toxtap qalmidi” dep yazghan.

Shu küni yene, kéngesh palata ezaliri marko rubiyo, kiris kunis, awam palata ezasi mayk léwin, kim yang, amérikaning birleshken döletler teshkilatida turushluq elchisi linda tomas girinfiyld we litwa parlamént ezasi dowili sakalini qatarliqlar, shundaqla jeymis milward, soféy réchardson qatarliq nurghunlighan bashqa tonulghan shexsler ekberning tughulghan künini xatiriligen. Ular tiwittér uchurlirida birdek ekber es'et we uninggha oxshash nurghun kishilerning peqet Uyghur bolghanliqi üchünla türmilerde azab tartiwatqanliqini we buninggha derhal xatime bérilishi kéreklikini tekitleshken.

Reyhan es'et amérikaning her yilda bir ötküzidighan “Démokratiye yuqiri derijilikler yighini” gha tor arqiliq qatnashqan körünüsh. 2921-Yili 8-dékabir.

Reyhan es'et bizge qilghan sözide inisi ekberning intayin yaxshi telim-terbiye körgen, öz saheside utuq qazan'ghan we amérikagha kélip tashqi ishlar ministirliqining intayin nopuzluq programmisigha qatnashqan bir istiqballiq yash bolushidek alahidilikining zor diqqet qozghighanliqi, chünki uning xitay hökümiti ilgiri sürüwatqan “Bu kishiler ashqun, terbiyeleshke éhtiyajliq kishiler” dégendek sepsetilerning pütünley yalghanliqini ispatlap béridighanliqini éytti.

Reyhan es'et nöwette ötken ayda amérikaning her yilda bir ötküzidighan “Démokratiye yuqiri derijilikler yighini” gha qatnashqanda amérika tashqi ishlar ministiri antoniy bilinkén bilen körüshüp uninggha inisining ehwalini tonushـturghan we xitay hökümitini ekber es'etni qoyuwétishke chaqirghan.

Uyghur tilidiki nuqtiliq xewer we mulahize tor betliridin bolghan “Baghdash” tor sehipisining qurghuchisi, téxnika karxanichisi we saxawetchi ekber es'et 2016-yili féwralda amérika tashqi ishlar ministirliqining teklipi bilen “Xelq'araliq ziyaretchi rehberlerni terbiyelesh programmisi” gha qatnishish sheripige érishken az sandiki Uyghur karxanichilirining biri idi. Biraq u mushu seperdin qaytip uzun ötmeyla yeni 2016-yili 4-ayda tutqun qilin'ghan we aridin 4 yil ötkende yeni 2020-yili yanwar éyida uning “Milliy öchmenlikke qutratquluq qilish jinayiti” bilen 15 yilliq qamaq jazasigha höküm qilin'ghanliqi melum bolghanidi.

Reyhan es'et inisi ekber es'etning hazir shara'itining eng nacharliqi we zalimliqi bilen nami pur ketken aqsu türmiside azab tartiwatqanliqini, emma ekberni we bashqa milyonlighan insanlarni nabut qilghanlarmu jawabkarliqqa tartilidighan künlerning choqum kélidighanliqini éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.