Muhajir saniye xanim: dostumning oghlini öylesh pilanini xitayning 100 künlük zerbe dolquni berbat qildi

Muxbirimiz shöhret hoshur
2022.08.15
Share on WhatsApp
Share on WhatsApp
Rifat-Enwer Rifat enwer, resimni türkiyediki saniye xanim teminligen. Resim tartilghan orun we waqit éniq emes.
Photo: RFA

Muhajirettiki guwahchilarning inkas qilishiche, ürümchidiki shinxu'a kitabxanisining xizmetchisi, 29 yashliq rifat enwer, ötken ayning otturiliri, toy teyyarliqi bilen meshghul boluwatqan künliride tutqun qilin'ghan؛ déyilishiche, uning tutulushigha-ilgiri türkiyede oqughan bolushi we aldinqi aylarda Uyghur élida dawam qilghan 100 künlük zerbe dolquni seweb bolghan. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Uyghur élida 2017 ‏-yili bashlan'ghan chong tutqun 6 ‏-yiligha ötken bügünki kündimu, ilgiri tutulghanlar qoyup bérilishte yoq, yéngidin tutulushlar yene dawam qilmaqta. Norwégiyediki Uyghuryar fondining yéqinda ürümchidin igilishiche, shinxu'a kitabxanisining xizmetchisi, 29 yashliq rifat enwer, ötken ayning 22 ‏-küni tutqun qilin'ghan.  Déyilishiche, rifat enwer özi olturushluq bolghan  ürümchidiki jingnen ahaliler rayoni tewe saqchixana teripidin tutqun qilin'ghan.  Téléfonimizni qobul qilghan, ürümchidiki qalighach saqchixana xadimi, yen'en yolidiki shinxu'a kitabxanisining baxulyang saqchixanisigha qaraydighanliqini bildürüp, rifat enwer heqqide melumat bérishni ret qildi.

Biz rifat enwerning türkiyediki sawaqdashliri arqiliq, uning apisining dosti bolghan saniye xanim bilen alaqileshtuq. Saniye xanim, rifatning anisi bilen yéqin'ghiche, ündidarda salamliship kelgen bolup,  bu salamlishishlar jeryanida, mezkur a'ilining rifatning toyigha teyyarliq qiliwatqanliqidin xewer tapqan. Emma u ötken ayning otturiliridin rifatning apisining ündidargha chiqmas bolup qalghanliqini  bayqighan, u buningdin  asasen mezkur a'ilige kelgen  bir köngölsizlikni perez qilghan we bashqa munasiwetlik qanalliri  arqiliq, rifat enwerning tutqun qilin'ghanliqidin xewer tapqan.

Uyghuryar fodining yétekchisi abduweli ayupning déyishche, rifatning tutulushigha  uning türkiyede oqughan bolushidin sirt, uning 29 bolushi, yene xeterlik ewlad katégoriyesige kirishi seweb bolghan.

Saniye xanimning igilishiche, rifat enwer, ötken aylarda, xitayda memliket boyiche dawam qilghan  “100 Künlük qara küchlerge zerbe bérish dolquni”da  tutqun qilin'ghan.  Ötken aydiki éniqlashlirimiz dawamida xotendiki bir saqchi xadimi, xitayda dawam qilghan qara küchlerge zerbe bérish dolqunining Uyghur rayonigha kelgende, siyasiy zerbige aylinip tordin chüshüp qalghan atalmish térrorchi we ikki yüzlimichilerge zerbe bérilgenlikini pash qilghanidi.

Saniye xanim, mezkur dolqunning ürümchidiki ijra'ati dawamida, ilgiri jazalanmay qalghan gumandarlarning nuqtiliq nishan bolghanliqi we rifat enwerningmu mana mushu dolqunning qurbani bolghanliqini ilgiri sürdi.  U dosti roshen'gül xanimning oghlini öylük -ochaqliq arzusning, siyasiy bir quyunning buzghunchiliqigha uchrighanliqini eskertidu.

Yuqiriqi uchurlar, xuddi muhajirettiki Uyghur közetküchiler perez qilghinidek, gerche  sabiq emeldar chén chüen'go, Uyghur rayonidin yötkelgen bolsimu, uning “ Tutushqa tégishliklerning hemmisini tutush” buyruqining yéngi emeldar  dewridimu izchil ijra qiliniwatqanliqi we bu ijra'atning yéqin arida toxtimaydighanliqidin bisharet bermekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.