Рошән аббас ханим пирагада җаза лагерлири мәсилиси тоғрисида доклат бәрди

Ихтиярий мухбиримиз әкрәм
2019-05-31
Share
chex-jumhuriyiti-piraga-us-embassy-rushen-abbas-1.jpg "уйғур һәрикити" тәшкилатиниң директори рошән аббас ханим чех җумһурийитиниң пирага шәһиридики америка әлчиханисида өткүзүлгән йиғинда сөз қилмақта. 2019-Йили 29-май.
Photo: RFA

Америкадики "уйғур һәрикити" тәшкилатиниң директори рошән аббас ханим америка ташқи ишлар министирлиқиниң орунлаштуруши билән 28-май австрийәниң пайтәхти вийенна шәһиридики "америка мәдәнийәт сарийи" да җаза лагерлири тоғрисида доклат бәргәниди. 29-Май у чех җумһурийитиниң пирага шәһиригә йетип келип америка әлчиханисиниң саһибханилиқида тәшкилләнгән йәнә бир йиғинда уйғурлар вә униң нөвәттики вәзийити тоғрисида нутуқ сөзлигән.

Җаза лагерлири мәсилиси оттуриға чиққандин буян "вашингтон почтиси гезити", "әлҗәзирә" қатарлиқ дуняниң һәр қайси әллиридики көплигән мәшһур ахбарат васитилириниң зияритини қобул қилип "шәрқий түркистанниң нөвәттики вәзийити тоғриси" да мәлумат берип келиватқан рошән аббас ханим 30-май чех җумһурийитиниң пайтәхти пирага шәһиригә йетип кәлгән һаманла ахбарат саһәсиниң җиддий зиярәт обйектиға айланған. У бу шәһәрдики гезит, радио, телевизийә қатарлиқ ахбарат васитилириниң зияритини қобул қилип, хитайниң шәрқий түркистанда тәсис қилған җаза лагерлири мәсилисини тәпсилий аңлатқан.

Пирага шәһиридин зияритимизни қобул қилған рошән аббас ханимниң билдүрүшичә, у 30-май чүштин бурун америка әлчиханиси тәшкиллигән һәрсаһә илим адәмлири, сиясийонларниң юмилақ үстәл йиғиниға қатнишип, бу йепиқ йиғинда җаза лагерлири тоғрисида тәпсилий мәлумат бәргән. 

Рошән аббас ханим 30-май йәнә пирага шәһиридә "уйғурлар тоғрисида муназирә: хитайдики җаза лагерлири" темисида кәч саәт 18:00 дин 20:00 гичә давам қилған бир очуқ йиғинда доклат беришкә тәклип қилинған. Йиғинға пирага шәһиридики сиясәтчиләр, кишилик һоқуқ паалийәтчилири, алий мәктәп оқуғучилири, уйғурлар мәсилисигә қизиққучи авам хәлқ вә ахбарат саһәсиниң хадимлири болуп көп санда киши қатнашқан. У йиғинда қилған сөзидә җаза лагерлири мәсилисини нуқтилиқ оттуриға қоюп, дуня җамаитиниң уйғурларға игә чиқишини мураҗиәт қилған. 

Пирагада өткүзүлгән бу йиғинға мюнхен шәһиридә яшаватқан нурәхмәт әпәндиму берип қатнашқан. У бу йиғинниң бәс-муназирә билән қизғин кәйпият ичидә давам қилғанлиқини, йиғинниң өзидә чоңқур тәсират қалдурғанлиқини тилға алди. 

Америка әлчиханисиниң саһипханлиқи билән австрийә, чех җумһурийитидә уюштурулған бу йиғинлар 4 күн давам қилған болуп, паалийәт күнтәртипигә асасланғанда рошән аббас ханим 30-май бир күн ичидә пирагада әтигән саәт 8:00 дин кәч саәт 20:00 гичә охшимиған орунларда өткүзүлгән 5 йиғинға қатнишип нутуқ сөзлигән. Кәч саәт 22:00-23:00 гичә чехийәниң т б ч телевизийә қанилиниң зияритини қобул қилған. 

Рошән аббас ханимниң 31-май күни пирагада йәнә 3 йәрдә паалийити болуп, буниң бири бүгүн кәч америкиниң пирагадики әлчиханисида өткүзүлидиған йепиқ йиғин икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт