Мәкит наһийәсидики аһалиләр роза тутқанларни байқиса сақчиға мәлум қилишқа буйрулған

Мухбиримиз шөһрәт һошур
2020-05-13
Елхәт
Пикир
Share
Принт
Мәһәллә башқуруш комитети вә сақчиларниң уйғурларни тәкшүрүп кәлгән көрүнүши. 2018-Йили 6-авғуст, қәшқәр.
Мәһәллә башқуруш комитети вә сақчиларниң уйғурларни тәкшүрүп кәлгән көрүнүши. 2018-Йили 6-авғуст, қәшқәр.
AP

Мухбиримизниң бу йиллиқ рамазан вәзийити һәққидә уйғур районидики һәр дәриҗилик хадимларға қарита елип барған телефон зиярәтлири давамида бәзи хадимлар бу йилму рози тутмаслиқ һәққидә аһалиләргә ашкара уқтуруш қилинғанлиқини билдүрсә, йәнә бәзи хадимлар өз тәвәликидә 3 йилдин буян роза тутулмайватқанлиқи вә роза тутмаслиқ һәққидә уқтуруш қилишқиму һаҗәт қалмиғанлиқини илгири сүрди.

Илгирики йиллардики хәвәрләрдин мәлум болушичә, мусулман дунясида тинчлиқ, қериндашлиқ вә һәмкарлиқниң символи дәп қарилидиған рамазан ейида уйғур районида һәр йили адәттин ташқири назарәт вә нәзәрбәнт давам қилмақта. Сиясий йиғинлар үзлүксиз ечилиш, сақчилар кечә-күндүз чарлаш елип бериш, пайлақчилар ухлимай һәркәт қилиш уйғур райондики рамазан ейиниң асаслиқ аламәтлири сүпитидә оттуриға чиқмақта.

Биз рамазан ейидики бу йилқи иҗтимаий кәйпиятни ениқлап беқиш үчүн алди үрүмчидики алақидар сақчи органлириға телефон қилдуқ. Хадимлардин бири бу йилму рамазан сәвәблик мәхсус түзүм вә тәдбирләр бекитилгәнлики, әмма бу түзүмләрни ахбаратқа ашкарилашқа болмайдиғанлиқини баян қилди.

Телефонимизни қобул қилған мәкит наһийәсиниң мәлум бир йезисидики бир аяллар мудириниң баян қилишичә, мәзкур йезида бу йил рози тутмаслиқ һәққидә йиғинлар ечилған, уқтурушлар тарқитилған. Мәлум болушичә, илгирики йилларда роза тутуш бираз пәрдазланған һалда, йәни «роза тутуш-тутмаслиқ пуқраларниң ихтияридики иш икәнлики» вә «роза тутушқа зорланмаслиқи керәклики» тәкитләнгән болса, йеқинқи үч йилдин буян аһалиләр очуқ һалда роза тутмаслиққа буйрулған. Йәнә бир кәнт хадиминиң баян қилишичә, наһийәдә ечилған йиғинларда кәнт кадирлириға рози тутушни «диний әсәбийликниң аламити» дәп чүшәдүрүлгән вә төвәндә хизмәт давамидиму мушундақ чүшәндүрүш тәләп қилинған. Йәнә мәлум болушичә, йезидики тәшвиқатларда роза тутушниң аталмиш роһий зийинидин башқа тән саламәтликкә вә дөләт бихәтәрликигә зиянлиқ икәнликиму тәкитләнгән. Мәкиттә аһалиләр роза тутқанларни байқап қалса сақчиға мәлум қилишқа буйрулған.

Йәнә бир хадим өз тәвәликидә аһалиләрниң 3 йилдин бери роза тутмайватқанлиқи вә буниң бир адәткә айланғанлиқини илгири сүрди.

Пикирләр (0)
Share
Толуқ бәт