Mekit nahiyesidiki ahaliler roza tutqanlarni bayqisa saqchigha melum qilishqa buyrulghan

Muxbirimiz shöhret hoshur
2020-05-13
Élxet
Pikir
Share
Print
Mehelle bashqurush komitéti we saqchilarning Uyghurlarni tekshürüp kelgen körünüshi. 2018-Yili 6-awghust, qeshqer.
Mehelle bashqurush komitéti we saqchilarning Uyghurlarni tekshürüp kelgen körünüshi. 2018-Yili 6-awghust, qeshqer.
AP

Muxbirimizning bu yilliq ramazan weziyiti heqqide Uyghur rayonidiki her derijilik xadimlargha qarita élip barghan téléfon ziyaretliri dawamida bezi xadimlar bu yilmu rozi tutmasliq heqqide ahalilerge ashkara uqturush qilin'ghanliqini bildürse, yene bezi xadimlar öz tewelikide 3 yildin buyan roza tutulmaywatqanliqi we roza tutmasliq heqqide uqturush qilishqimu hajet qalmighanliqini ilgiri sürdi.

Ilgiriki yillardiki xewerlerdin melum bolushiche, musulman dunyasida tinchliq, qérindashliq we hemkarliqning simwoli dep qarilidighan ramazan éyida Uyghur rayonida her yili adettin tashqiri nazaret we nezerbent dawam qilmaqta. Siyasiy yighinlar üzlüksiz échilish, saqchilar kéche-kündüz charlash élip bérish, paylaqchilar uxlimay herket qilish Uyghur rayondiki ramazan éyining asasliq alametliri süpitide otturigha chiqmaqta.

Biz ramazan éyidiki bu yilqi ijtima'iy keypiyatni éniqlap béqish üchün aldi ürümchidiki alaqidar saqchi organlirigha téléfon qilduq. Xadimlardin biri bu yilmu ramazan seweblik mexsus tüzüm we tedbirler békitilgenliki, emma bu tüzümlerni axbaratqa ashkarilashqa bolmaydighanliqini bayan qildi.

Téléfonimizni qobul qilghan mekit nahiyesining melum bir yézisidiki bir ayallar mudirining bayan qilishiche, mezkur yézida bu yil rozi tutmasliq heqqide yighinlar échilghan, uqturushlar tarqitilghan. Melum bolushiche, ilgiriki yillarda roza tutush bir'az perdazlan'ghan halda, yeni "Roza tutush-tutmasliq puqralarning ixtiyaridiki ish ikenliki" we "Roza tutushqa zorlanmasliqi kérekliki" tekitlen'gen bolsa, yéqinqi üch yildin buyan ahaliler ochuq halda roza tutmasliqqa buyrulghan. Yene bir kent xadimining bayan qilishiche, nahiyede échilghan yighinlarda kent kadirlirigha rozi tutushni "Diniy esebiylikning alamiti" dep chüshedürülgen we töwende xizmet dawamidimu mushundaq chüshendürüsh telep qilin'ghan. Yene melum bolushiche, yézidiki teshwiqatlarda roza tutushning atalmish rohiy ziyinidin bashqa ten salametlikke we dölet bixeterlikige ziyanliq ikenlikimu tekitlen'gen. Mekitte ahaliler roza tutqanlarni bayqap qalsa saqchigha melum qilishqa buyrulghan.

Yene bir xadim öz tewelikide ahalilerning 3 yildin béri roza tutmaywatqanliqi we buning bir adetke aylan'ghanliqini ilgiri sürdi.

Toluq bet