Чақчақчи розахунниң бир мәзгил лагерда ятқанлиқи вә бир ай аввал қоюп берилгәнлики ашкариланди

Мухбиримиз шөһрәт һошур
2019-06-11
Елхәт
Пикир
Share
Принт
Чақчақчи розахун тудахун.
Чақчақчи розахун тудахун.
Social Media

Муһаҗирәттики уйғурлардин турсун рози исимлик бирәйләнниң фәйсбокида елан қилинған бир гуваһлиқ баянатида, ғулҗидики бир түркүм даңлиқ карханичилар қатарида, атақлиқ чақчақчи розахунниңму тутқунда икәнликигә гуваһлиқ берилгән. Паалийәтчи абдувәли аюпниң тутқундики зиялийлар вә сәнәткарлар тизимликидиму розахунниң лагерда икәнлики қәйт қилинған. Розахунниң йотуб қанилидики бир чатма юмуридин мәлум болушичә, у чапчал наһийәсиниң җағистай йезисидиндур. Җағистайдики бир кәнт секретари, розахунниң тутқунда икәнлики һәққидә мүҗмәл җаваб бериш билән бирликтә, униң қачан вә қәйәрдә тутулғанлиқи һәққидики соалимизға җаваб бериштин өзини қачурди. Йәнә розахунниң юмурлиридин униң ғулҗа шәһиридә бир ширкәт қурғанлиқи вә қериндашлири билән маңдуруватқанлиқи мәлум. Әмма лагер тутқунлири көпинчә һалларда өзлириниң әсли юртлиридики лагерларға соланған болғачқа, биз чапчал наһийәсидики сақчи хадимлиридин мәлумат соридуқ. Чапчаллиқ бир сақчи хадими розахунниң бир ай аввал лагердин қоюп берилгәнликини ашкарилиди. Әмма розахунниң қайси лагерда немә үчүн ятқанлиқи вә немә сәвәбтин қоюп берилгәнлики һәққидики соалимизға, җағистайдики бу делоға мәсул сақчиниңла җаваб берәләйдиғанлиқини ейтти.

Җағистайдики алақидар бир хадим, 3 айниң алдида, хизмәт мунасивити билән тәрбийәләш мәркизигә барғинида розахунни көргәнлики вә униң бир мәзгил чапчал наһийәлик 3-оттура мәктәптә тәсис қилинған йиғивелиш лагерида ятқанлиқини дәлиллиди. У йәнә розахунниң лагерда учратқинида саламәтликини яхши һалда көргәнликини әскәртти. Әмма хадимларниң һечбири розахуниң тутулуш вә қоюветилиш сәвәби һәққидә мәлумат берәлмиди. Вәзийәттин хәвәрдар кишиләрдин бәзилири, униң чақчақлириниң тема даирисиниң кәңлики вә һазир җаваблиқи, шу сәвәблик сақчиларниң униң чақчақлириниң мәзмунидин сиясий җәһәттә чатақ тапқанлиқини тәкитлисә, йәнә бәзиләр розахунниң тиҗаритиниң йеқинқи мәзгилләрдә тез ронақ тапқанлиқи вә бир қатар хәйр-сахавәт ишлири биләнму шуғулланғанлиқи, даириләрниң униң шу хәйр-сахавәт ишлиридин путимақ тапқанлиқини оттуриға қоймақта.

Чапчал вәзийитидин хәвәрдар кишиләрдин бири розахун гәрчә қоюп берилгән болсиму, йәнила назарәт астида икәнлики, униң тәкрар тутулуп кетилиш хәвпиниң мәвҗутлуқини илгири сүрди. Илгирики ениқлашлиримиз давамида мәшһур сахавәтчи нуртай һаҗи, өй-мүлүк содигири иляс ниязларниңму дәсләптә бир қетим тутуп қоюветилгәнлики, 2-3 айдин кейин қайта тутқун қилинип кесиветилгәнлики ашкариланған иди.

Пикирләр (0)
Share
Толуқ бәт