Chaqchaqchi rozaxunning bir mezgil lagérda yatqanliqi we bir ay awwal qoyup bérilgenliki ashkarilandi

Muxbirimiz shöhret hoshur
2019-06-11
Élxet
Pikir
Share
Print
Chaqchaqchi rozaxun tudaxun.
Chaqchaqchi rozaxun tudaxun.
Social Media

Muhajirettiki Uyghurlardin tursun rozi isimlik bireylenning feysbokida élan qilin'ghan bir guwahliq bayanatida, ghuljidiki bir türküm dangliq karxanichilar qatarida, ataqliq chaqchaqchi rozaxunningmu tutqunda ikenlikige guwahliq bérilgen. Pa'aliyetchi abduweli ayupning tutqundiki ziyaliylar we sen'etkarlar tizimlikidimu rozaxunning lagérda ikenliki qeyt qilin'ghan. Rozaxunning yotub qanilidiki bir chatma yumuridin melum bolushiche, u chapchal nahiyesining jaghistay yézisidindur. Jaghistaydiki bir kent sékrétari, rozaxunning tutqunda ikenliki heqqide müjmel jawab bérish bilen birlikte, uning qachan we qeyerde tutulghanliqi heqqidiki so'alimizgha jawab bérishtin özini qachurdi. Yene rozaxunning yumurliridin uning ghulja shehiride bir shirket qurghanliqi we qérindashliri bilen mangduruwatqanliqi melum. Emma lagér tutqunliri köpinche hallarda özlirining esli yurtliridiki lagérlargha solan'ghan bolghachqa, biz chapchal nahiyesidiki saqchi xadimliridin melumat soriduq. Chapchalliq bir saqchi xadimi rozaxunning bir ay awwal lagérdin qoyup bérilgenlikini ashkarilidi. Emma rozaxunning qaysi lagérda néme üchün yatqanliqi we néme sewebtin qoyup bérilgenliki heqqidiki so'alimizgha, jaghistaydiki bu délogha mes'ul saqchiningla jawab béreleydighanliqini éytti.

Jaghistaydiki alaqidar bir xadim, 3 ayning aldida, xizmet munasiwiti bilen terbiyelesh merkizige barghinida rozaxunni körgenliki we uning bir mezgil chapchal nahiyelik 3-ottura mektepte tesis qilin'ghan yighiwélish lagérida yatqanliqini delillidi. U yene rozaxunning lagérda uchratqinida salametlikini yaxshi halda körgenlikini eskertti. Emma xadimlarning héchbiri rozaxuning tutulush we qoyuwétilish sewebi heqqide melumat bérelmidi. Weziyettin xewerdar kishilerdin beziliri, uning chaqchaqlirining téma da'irisining kengliki we hazir jawabliqi, shu seweblik saqchilarning uning chaqchaqlirining mezmunidin siyasiy jehette chataq tapqanliqini tekitlise, yene beziler rozaxunning tijaritining yéqinqi mezgillerde téz ronaq tapqanliqi we bir qatar xeyr-saxawet ishliri bilenmu shughullan'ghanliqi, da'irilerning uning shu xeyr-saxawet ishliridin putimaq tapqanliqini otturigha qoymaqta.

Chapchal weziyitidin xewerdar kishilerdin biri rozaxun gerche qoyup bérilgen bolsimu, yenila nazaret astida ikenliki, uning tekrar tutulup kétilish xewpining mewjutluqini ilgiri sürdi. Ilgiriki éniqlashlirimiz dawamida meshhur saxawetchi nurtay haji, öy-mülük sodigiri ilyas niyazlarningmu deslepte bir qétim tutup qoyuwétilgenliki, 2-3 aydin kéyin qayta tutqun qilinip késiwétilgenliki ashkarilan'ghan idi.

Toluq bet