Сабиқ мәһбус мәмәттурсун осман: камердишим ели абдуқадир анисини һәрәмгә апарғанлиқи үчүн еғир тән җазасиға учриди

Мухбиримиз шөһрәт һошур
2019-08-07
Елхәт
Пикир
Share
Принт
Әзһәрдики әснәм уйғур ашханисиниң ашпизи мәмәттурсун осман әпәнди.
Әзһәрдики әснәм уйғур ашханисиниң ашпизи мәмәттурсун осман әпәнди.
RFA/Shöhret Hoshur

Хитайниң үрүмчи вә хотәндики 3 қамақханисида бир йилчә йетип чиққан сабиқ мәһбус мәмәттурсун осман, өзиниң хотән вилайәтлик дөләт бихәтәрлик қамақханисида ятқан мәзгилидики әслимилирини баян қилип, камердиши ели абдуқадирниң анисини һәрәмгә елип барғанлиқи вә бу җәрянда мисирда тохтап өткәнлики үчүн тутулғанлиқи вә еғир тән җазасиға учриғанлиқини паш қилди. Мухбиримизниң хотәнгә қарита елип барған телефон зиярәтлири давамида ели абдуқадирниң қарақаш наһийә ява йеза базарбойи кәнтиниң аһалиси икәнлики дәлилләнди.

Сабиқ мәһбус мәмәттурсун осман билән өткүзгән сөһбитимиз давамида, у камердиши ели абдуқадирниң анисини һәрәмгә апирип әкәлгәнлики үчүн тутулғанлиқи вә диний устазиниң ким икәнлики һәққидә сораққа тартилип, еғир тән җазасиға учриғанлиқини баян қилди. Мәмәттурсун осман ели абдуқадирниң наһийә вә йеза тәвәликини әслийәлмиди. Әмма униң нийә яки қарақаш наһийәсидин болуш еһтималлиқини илгири сүрди. Нийә наһийәсидики сақчи хадимлири ели абдуқадирни тонумайдиғанлиқи вә тонуған тәқдирдиму мәлумат берәлмәйдиғанлиқини ейтти.

Сабиқ мәһбус мәмәттурсунниң баян қилишичә, у ели абдуқадир билән өзи үчинчи қетим йөткәлгән қамақхана-хотән вилайәтлик дөләт бихәтәрлик қамақханисидики б 2-номурлуқ камерда 2017 ‏-йили 5 ‏-айда биллә ятқан. У бу қамақханиниң шараитлири вә илгири өзи ятқан қамақханидин пәрқлири һәққидә мунуларни баян қилиду. Униң дейишичә бу қамақханиға мәхсус мисирдин қайтқан кишиләр қамалған. Ели абдуқадир аписи билән һәҗ сәпиридә бир мәзгил мисирда турғанлиқи үчүн бу қамақханиға қамалған.

Ели абдуқадирниң еғир тән җазасиға учриғанлиқини өз көзи билән көргәнлики вә ярисини таңғанлиқини баян қилған мәмәттурсун осман; ели абдуқадирниң икки камердишида ич ағриқи пәйда қилмаслиқ үчүн өз җараһитини йошурушқа тиришқанлиқини тилға алди.

Мәмәттурсун османниң дейишичә, ели абдуқдир тән җазасидин қутулуш үчүн сақчиларниң күткини бойичә аталмиш бөлгүнчилик вә террорлуқ җинайәтлирини бойниға алған.

Мәмәттурсун қамақтин чиққанда, ели абдуқадир техи қамақта қепқалған болғачқа униң қанчә йил кесилгәнлкидин хәвәрсиз қалған.

Биз, ели абдуқадирниң җаза кесими вә нопус тәвәликини ениқлаш үчүн қариқаш наһийәсигиму телефон қилдуқ. Қарақашниң ява йеза сақчи хадими мисирдин қайтип кәлгән ели абдуқадирниң ява йеза базарбойи кәнтидин икәнликини ашкарилиди. Әмма у ели абдуқадирниң тутулуш сәвәбидин хәвәрсиз икәнликини ейтти. ява йезисидики хадимлардин бири анисини һәрәмгә апарғанлиқи үчүн тутулған ели абдуқадирниң ява йезисиниң базар бойи кәнтидин икәнликини дәлиллиди. Әмма у ели абдуқадирниң қанчә йил кесилгәнлики вә нөвәттә қайси җаза лагерида икәнлики һәққидики соалимизға, өзиниң базарбойи кәнтидин 8 километирчә йирақлиқта олтуридиғанлиқини сәвәб көрситип, униң җаза муддитидин хәвәрсизликини ейтти.

Сабиқ мәһбус мәмәттурсун османниң баян қилишичә, бу қамақханида тән җазасиға учраватқанлар ялғуз ели абдуқадир әмәс. У бу қамақханиниң бир қәвитидә 10 сорақхана барлиқи, сорақ 24 саәт давам қилидиғанлиқи, бу 24 саәт давамида сорақханилардин қия-чия авазларниң үзүлмәйдиғанлиқини баян қилди. У йәнә сақчиларниң өзини: «иқрар қилмисаң, бу қамақханидин мушу бир ай ичидә чиққан 24 ‏-өлүк сән болисән» дәп чөчүтүвәткәнликини әскәртти.

Мәлум болушичә, бу йил 51 яшқа киргән ели абдуқадир ява йезисида йүк тошуш мулазимити билән шуғуллинип келиватқан, йәни шопурлуқ кәспи билән тирикчилик қиливатқан вә 4 балиниң дадиси болған адәттики бир аһалидур.

Һөрмәтлик радио аңлиғучилар, юқирида, хотән қарақашлиқ ели абдуқадирниң анисини һәрәмгә апарғанлиқи үчүн диний әсәбийлик гумани билән тутқун қилинғанлиқи вә қамақханида еғир тән җазасиға учриғанлиқи һәққидә аңлитиш бәрдуқ.

Пикирләр (0)
Share
Толуқ бәт