Ürümchi sheherlik j x idarisining mu'awin bashliqi jür'et ibrahimningmu tutqunda ikenliki ashkarilandi

Muxbirimiz shöhret hoshur
2019-09-18
Élxet
Pikir
Share
Print
Ürümchi sheherlik  j x idarisining mu'awin bashliqi jür'et ibrahimning 2014-yili xizmet körsitip mukapatlan'ghan körünüshi.
Ürümchi sheherlik j x idarisining mu'awin bashliqi jür'et ibrahimning 2014-yili xizmet körsitip mukapatlan'ghan körünüshi.
xinjiangnet.com.cn

Ürümchi sheherlik j x idarisining sabiq mu'awin bashliqi qadir memetning tutulghanliqi heqqidiki xewirimiz élan qilin'ghandin kéyin, weziyettin xewerdar kishilerdin biri, qadir memmettin ikki hepte awwal mezkur idarining yene bir mu'awin bashliqi jür'et ibrahimningmu tutulghanliqi we bu ikkisining délosining bir-birige chétishliq ikenlikini melum qildi. Muxbirimizning ikki heptidin buyanqi téléfon ziyaretliri dawamida jür'et ibrahimning tutqunda ikenliki aydinglashti.

Ürümchidiki yuqiri derijilik kadirlarning weziyitidin xewerdar kishilerdin birining radiyomizgha inkas qilishiche, ürümchi sheherlik j x idarisining yene bir mu'awin bashliqi jür'et ibrahimmu buningdin 3 ayche ilgiri tutulghan. Xitay xewer arxiplirida bayan qilinishiche, jür'et ibrahim 2014 ‏-yillardin buyan ürümchi sheherlik j x iradisi partkomning hey'et ezasi we sheherlik dölet amanliq saqchi etritining siyasiy komissari qatarliq wezipilernimu üstige alghan. Téléfonimizni qobul qilghan ürümchi shehiridiki saqchi xadimliri, jür'et ibrahim heqqidiki herqandaq bir so'alimizgha jawab bermidi.

Xitay tor arxiplirida bayan qilinishiche, ürümchi sheherlik j x idarisi 2014 ‏-yili memliket boyiche "Xelq razi bolghan ilghar kolléktip" bolup bahalan'ghan, jür'et ibrahim sheherlik j x idarisige wakaliten mezkur yighin'gha qatniship mukapat tapshuruwalghan. Téléfonimizni qobul qilghan ürümchidiki her derijilik saqchi xadimliri jür'et ibrahimning nediliki heqqidiki so'alimizgha jawab bérelmidi. Weziyettin xewerdar kishining radiyomizgha bildürüshiche, jür'et ibrahim sabiq xizmetdishi qadir memettin ikki hepte burun tutulghan. Weziyettin xewerdar kishining inkasida bu ikki mu'awin bashliqning j x saheside, bolupmu lagérlar mesiliside bek köp nerse bilip ketkenliki üchün tutulghanliqi ilgiri sürülgen. Alaqidar xadimlar jür'et ibrahimning nöwette wezipisini ijra qiliwatqan yaki qilmaywatqanliqidiki so'alimiznimu jawabsiz qaldurdi.

Inkasta jür'et ibrahim tutulghandin kéyin, qadir memetning soraqqa tartilghanliqi we bu ikkisining tutulush délosining bir-birige chétishliq ikenliki ilgiri sürülgen؛ emma ikkisining qaysi nuqtida chétilidighanliqi tilgha élinmighan. Peqet jür'et ibrahimning j x sahesidiki Uyghur xadimlar bilen olturghan jem bolghan bir sorunda, nöwette terbiyelesh merkizide tutup turuluwatqanlarning omumi sanini ashkarilap qoyghanliqi bayan qilghan؛ emma jür'etning omumi san heqqide éniq néme dégenliki tilgha élinmighan. Xadimlardin jür'et ibrahimning dölet mexpiyetlikini ashkarilap qoyghanliqi uchurining toghra-xataliqini sorighinimizda, bu heqte alaqidar rehberlerdin melumat élishimizni tewsiye qildi.

Inkasta déyilishiche, jür'et ibrahim buningdin 5 ayche ilgiri duch kelgen deslepki soraqta, terbiyeleshtikilerning omumi sanini qesten ashkarilimighanliqi, peqet gepke toghra kelgende qol astidiki xadimlarni jasaretlendürüsh üchün tilgha alghanliqini bayan qilip, özini aqlighan. Inkasta yene déyilishiche, jür'et ashkarilighan bu san j x sahesidiki cheklik kishilerdin bashqilargha tarqalmighanliqi üchün, u deslepki soraqta qutulup qalghan؛ emma 6 ‏-ayning axiridiki bir qayta soraqta, dölet mexpiyetlikini ashkarilash bilen eyiblinip tutulghan we özi minglarche kishini solighan we solashqa buyrughan qamaqxanigha özimu koyzilan'ghan halette apirilghan. Biz saqchi xadimliridin jür'et ibrahimning dölet mexpiyetlikini ashkarilap qoyghanliqi heqqidiki uchurning torgha yaki xataliqini soriduq. Xadimlar bu heqtimu özlirining melumat bérelmeydighanliqini tekitlidi.

Xadimlardin biri jür'et ibrahimning néme üchün tutulghanliqi heqqidiki so'alimizgha jawaben, bu déloni aptonom rayondin igilishimizni tewsiye qildi. Biz uningdin özining jür'et ibrahimning tutulghaniqidin xewiri bar-yoqluqini sorighinimizda "Bar" dep jawab berdi. U özining bu heqte jawab bermeslikining "Bir jasaretsizlik, yaki bilmeslik mesilisi emes, belki, xizmet tertipi mesilisi ikenliki" ni bayan qilish arqiliq jür'etning tutqunda ikenlikini delillidi. Yene bir xadim bolsa, jür'et ibrahimning qaysi qamaqta ikenlikini sorighinimizda bu heqte xxxx saqchixanisidkilerning xewerdar ikenlikini ashkarilidi. Bu saqchixana xadimi bolsa, jür'et ibrahimning atalmish terbiyelesh merkizide ikenlikini tilgha aldi. Emma jür'et ibrahimning néme üchün terbiyeleshke ekétilgenliki we qaysi merkezge ekétilgenliki heqqidiki so'alimizgha jawab bermidi.

Hörmetlik radi'o anglighuchilar, éniqlashlirimizdin mu'awin saqchi bashliqi jür'et ibrahimning tutqunda ikenliki melum bolghan bolsimu, uning halda néme sewebtin tutulghanliqi aydinglashmidi. Atalmish terbiyeleshtiki kishilerning omumi sanining 3 milyondin artuq ikenliki xelq'ara teshkilatlar teripidin we hetta bezi amérika dölet erbabliri teripidin tilgha élin'ghan bolsimu, xitay hazirghiche élip barghan teshwiqatlirining héchbiride éghizgha élishqa jür'et qilalmighan. Uyghur rayonining re'isi shöhret zakirmu nechche milyon dégen sanning mubalighe ikenliki dégen, emma éniq sanni éghizgha alalmighan. Shunga inkaschi otturigha qoyghan jür'et ibrahimning lagérdikilerning sanini éghizidin chiqirip qoyghanliqi üchün tutulghanliqi uchuri gerche eqilge uyghundek körünsimu, emma éniqlashlirimizdin bu heqte éniq bir delil tépilmidi.

Pikirler (0)
Share
Toluq bet