“шинҗаң сақчи һөҗҗәтлири” дики уйғур тутқунларниң симаси америка дөләт мәҗлиси алдида намайән болди

Мухбиримиз нуриман
2022.05.31
Share on WhatsApp
Share on WhatsApp
saqchi-hojjetliri-resim-1.jpg

saqchi-hojjetliri-resim-2.jpg

saqchi-hojjetliri-resim-3.jpg

saqchi-hojjetliri-resim-4.jpg

saqchi-hojjetliri-resim-5.jpg

saqchi-hojjetliri-resim-6.jpg

saqchi-hojjetliri-resim-7.jpg

saqchi-hojjetliri-resim-8.jpg

saqchi-hojjetliri-resim-9.jpg

saqchi-hojjetliri-resim-10.jpg

29-Май күни америка уйғур бирләшмисиниң тәшкиллиши билән америкадики уйғур җамаити, пайтәхт вашингтондики америка дөләт мәҗлисиниң алдида намайиш өткүзди. Бу намайиш америка вә дуняниң диққитини йеқинда ашкариланған “шинҗаң сақчи һөҗҗәтлири” дики уйғурларниң ечинишлиқ әһвалиға қаритиш үчүн елип берилди.

Намайишчилар, “шинҗаң сақчи һөҗҗәтлири” дики 2884 нәпәр уйғур тутқунниң баш сүрәтлири арисидин таллап чоңайтилиған 500 кишиниң сүритини америка дөләт мәҗлиси алдидики чимлиққа рәтлик тизди. Сүрәтләр ичидики көзлири лиққдә яшқа толған 50 яшлиқ һавагүл тәвәккүл вә 15 яшлиқ омақ қиз раһилә өмәрни өз ичигә алған йүзлигән сулғун сималар, йолдин өтүп кетиватқан кишиләрниңму диққитини тартти.

Намайиш башлиниши билән америка уйғур бирләшмисиниң рәиси әлфидар илтәбир ханим ечилиш сөзи сөзлиди. У сөзидә хитай һөкүмитиниң лагер-түрмиләргә соливалған милйонлиған бигунаһ уйғур тутқунларни дәрһал қоюп беришини тәләп қилди. У йәнә б д т кишилик һоқуқ алий комиссари мишел бачелетниң уйғур райони һәққидики һәққидики доклатни тездин елан қилишни тәләп қилди.

“шинҗаң сақчи һөҗҗәтлири” дики көз юмувалғусиз пакитлар хитайниң ирқий қирғинчилиқ җинайәтлирини дуняға ашкарилаватқан бир пәйттә, мишел бачелетниң хитайдин қуруқ қол қайтиши, хәлқарадики кишилик һоқуқ тәшкилатлири билән муһаҗирәттики уйғурларни қаттиқ үмидсизләндүргән иди.

Бүгүнки намайишқа лагер шаһиди турсунай зиявудун ханимму қатнашқан болуп, у сәпниң алдида ай-юлтузлуқ көк байрақни егиз көтүргән һалда баштин-ахир йиғламсирап турди. У радийомизға сөз қилип, “шинҗаң сақчи һөҗҗәтлири” дики ашу сүрәтләрни көргән күни, өзиниң әйни вақитта лагерда тартқан хорлуқлирини қайта яшиғандәк болғанлиқни ейтип өтти.

У йәнә мундақ деди: “рәсимдики кишиләрниң чирай ипадисигә вә йүзлиригә диққәт қилдиңларму? улар сүрәткә елинидиған чағда йиғлиса яки ғәзәплик һаләттә турса болмайду. Йенида пәләй тақап турған һилқи хитай аял уларниң чирай ипадисини контрол қилип туриду. Мени әйни вақитта сүрәткә тартқанда, мән йиғлаверип үч күнгичә сүрәткә тарталмай, мени тиллап кәткән иди.”

Намайиш давамида америка уйғур бирләшмисиниң һәйәт әзаси мисран долан ингилиз тилида нутуқ сөзләп, бүгүнки намайишниң мәқсти һәққидә чүшәнчә бәрди.

Мәлум болушичә, ашкариланған сақчи һөҗҗәтлиридики тутқунлар қәшқәр конашәһәр наһийәсиниң йәрлик аһалилири болуп, улар 2018-йили тутқун қилинғанлар икән. “курсант” дегән нам билән пәрдазлап көрситилгән бу тутқунларниң әң кичики 15 яш, әң чоңи 75 яш икән.

Әлфидар илтәбир ханим радийомизниң зияритини қобул қилип, бүгүнки намайишниң әркин дуняда яшаватқан уйғурланиң зулум астида яшаватқан қериндашлирини қутқузуш үчүн қилған бир тиришчанлиқи икәнликини билдүрди.

Намайишқа қатнашқан әнвәр мәмәт вә мәмәтили султан қатарлиқ уйғурларниң билдүрүшичә, ашу сүрәтләрдики тутқунлар улар билән юртдаш икән. Әнвәр әпәнди сүрәтләр арисидин өзиниң бир нәврә туғиқинини, мәмәтили әпәнди өзиниң бир савақдишини тунуғанлиқини билдүрди.

Бүгүнки намайиш уйғур җамаитиниң еғир зулум астидики вәтәндашлири вә қериндашлириға қилған дуалири билән ахирлашти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.