“Shinjang saqchi höjjetliri” diki Uyghur tutqunlarning simasi amérika dölet mejlisi aldida namayen boldi

Muxbirimiz nur'iman
2022.05.31
Share on WhatsApp
Share on WhatsApp
saqchi-hojjetliri-resim-1.jpg

saqchi-hojjetliri-resim-2.jpg

saqchi-hojjetliri-resim-3.jpg

saqchi-hojjetliri-resim-4.jpg

saqchi-hojjetliri-resim-5.jpg

saqchi-hojjetliri-resim-6.jpg

saqchi-hojjetliri-resim-7.jpg

saqchi-hojjetliri-resim-8.jpg

saqchi-hojjetliri-resim-9.jpg

saqchi-hojjetliri-resim-10.jpg

29-May küni amérika Uyghur birleshmisining teshkillishi bilen amérikadiki Uyghur jama'iti, paytext washin'gtondiki amérika dölet mejlisining aldida namayish ötküzdi. Bu namayish amérika we dunyaning diqqitini yéqinda ashkarilan'ghan “Shinjang saqchi höjjetliri” diki Uyghurlarning échinishliq ehwaligha qaritish üchün élip bérildi.

Namayishchilar, “Shinjang saqchi höjjetliri” diki 2884 neper Uyghur tutqunning bash süretliri arisidin tallap chongaytilighan 500 kishining süritini amérika dölet mejlisi aldidiki chimliqqa retlik tizdi. Süretler ichidiki közliri liqqde yashqa tolghan 50 yashliq hawagül tewekkül we 15 yashliq omaq qiz rahile ömerni öz ichige alghan yüzligen sulghun simalar, yoldin ötüp kétiwatqan kishilerningmu diqqitini tartti.

Namayish bashlinishi bilen amérika Uyghur birleshmisining re'isi elfidar iltebir xanim échilish sözi sözlidi. U sözide xitay hökümitining lagér-türmilerge soliwalghan milyonlighan bigunah Uyghur tutqunlarni derhal qoyup bérishini telep qildi. U yene b d t kishilik hoquq aliy komissari mishél bachélétning Uyghur rayoni heqqidiki heqqidiki doklatni tézdin élan qilishni telep qildi.

“Shinjang saqchi höjjetliri” diki köz yumuwalghusiz pakitlar xitayning irqiy qirghinchiliq jinayetlirini dunyagha ashkarilawatqan bir peytte, mishél bachélétning xitaydin quruq qol qaytishi, xelq'aradiki kishilik hoquq teshkilatliri bilen muhajirettiki Uyghurlarni qattiq ümidsizlendürgen idi.

Bügünki namayishqa lagér shahidi tursun'ay ziyawudun xanimmu qatnashqan bolup, u sepning aldida ay-yultuzluq kök bayraqni égiz kötürgen halda bashtin-axir yighlamsirap turdi. U radiyomizgha söz qilip, “Shinjang saqchi höjjetliri” diki ashu süretlerni körgen küni, özining eyni waqitta lagérda tartqan xorluqlirini qayta yashighandek bolghanliqni éytip ötti.

U yene mundaq dédi: “Resimdiki kishilerning chiray ipadisige we yüzlirige diqqet qildinglarmu? ular süretke élinidighan chaghda yighlisa yaki ghezeplik halette tursa bolmaydu. Yénida peley taqap turghan hilqi xitay ayal ularning chiray ipadisini kontrol qilip turidu. Méni eyni waqitta süretke tartqanda, men yighlawérip üch kün'giche süretke tartalmay, méni tillap ketken idi.”

Namayish dawamida amérika Uyghur birleshmisining hey'et ezasi misran dolan in'giliz tilida nutuq sözlep, bügünki namayishning meqsti heqqide chüshenche berdi.

Melum bolushiche, ashkarilan'ghan saqchi höjjetliridiki tutqunlar qeshqer konasheher nahiyesining yerlik ahaliliri bolup, ular 2018-yili tutqun qilin'ghanlar iken. “Kursant” dégen nam bilen perdazlap körsitilgen bu tutqunlarning eng kichiki 15 yash, eng chongi 75 yash iken.

Elfidar iltebir xanim radiyomizning ziyaritini qobul qilip, bügünki namayishning erkin dunyada yashawatqan Uyghurlaning zulum astida yashawatqan qérindashlirini qutquzush üchün qilghan bir tirishchanliqi ikenlikini bildürdi.

Namayishqa qatnashqan enwer memet we memet'ili sultan qatarliq Uyghurlarning bildürüshiche, ashu süretlerdiki tutqunlar ular bilen yurtdash iken. Enwer ependi süretler arisidin özining bir newre tughiqinini, memet'ili ependi özining bir sawaqdishini tunughanliqini bildürdi.

Bügünki namayish Uyghur jama'itining éghir zulum astidiki wetendashliri we qérindashlirigha qilghan du'aliri bilen axirlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.