Үрүмчи ямалиқ сақчиханисиниң хадими әнвәр абдушүкүрниң тутқунда икәнлики дәлилләнди

Мухбиримиз шөһрәт һошур
2022.02.22
Share on WhatsApp
Share on WhatsApp
Үрүмчи ямалиқ сақчиханисиниң хадими әнвәр абдушүкүрниң тутқунда икәнлики дәлилләнди Сақчи хадимлириниң сиясий арқа көрүнүшини қайтидин омумйүзлүк тәкшүрүштә “мәсилә байқалған” дәп тутқун қилинған үрүмчи сайбағ райони ямалиқ сақчиханисиниң хадими әнвәр абдушүкүрдур. (Вақти вә орни ениқ әмәс)
Abdusemi Abduréhim teminligen

Мәлум болушичә, 2017‏-йили уйғур районида чоң тутқун башланғандин кейин, сақчи хадимлириниң сиясий арқа көрүнүши қайтидин омумйүзлүк бир қетим тәкшүрүлгән. Бу тәкшүрүштә уйғур сақчи хадимлириниң бир қисмиму “сиясий җәһәттин гуманлиқ” дәп қарилип бешиға қара халта кийдүрүлгән вә кесиветилгән. Булардин әң йеқинда ашкариланғини үрүмчи сайбағ райони ямалиқ сақчиханисиниң хадими әнвәр абдушүкүрдур. У әнә шу тәкшүрүштә “мәсилә байқалған” дәп тутқун қилинған.

Өткән айда японийәдики абдусәми абдуреһим әпәнди, японийәдә оқуп қайтқан тутқундики акиси абдухелил абдуреһим һәққидә радийомизға мәлумат бәргән мәзгилидә, җийәни әнвәр абдушүкүрниңму акисидин аввал тутқун қилинғанлиқи вә 7 йиллиқ кесиветилгәнликини мәлум қилғаниди. Дейилишичә, әнвәр абдушүкүрму бир мәзгил японийәдә оқуған вә юртиға қайтқандин кейин, оқуған кәспидә иш тапалмиғанлиқтин бир сақчиханиға ишқа чүшкәникән. Биз абдусәми тәминлигән йип учлириға асасән үрүмчи сайбағ районидики сақчиханиларға телефон қилдуқ. Хадимларниң көпинчиси худди илгирикигә охшашла, соаллиримизға җаваб беришни рәт қилди.

Әнвәр абдушүкүр һәққидә ениқлашлиримиз давам қиливатқан күнләрдә, муһаҗирәттики үрүмчи вәзийитидин хәвәрдар кишиләрдин бири соаллиримизға елхәт арқилиқ җаваб берип, 2017‏-йили уйғур районида чоң тутқун башланғандин кейин, сақчилар үстидин омумйүзлүк дегүдәк сиясий арқа көрүнүшини тәкшүрүш елип берилғанлиқи вә бу җәрянда зор бир түркүм уйғур сақчилириниң тутқун қилинғанлиқини ашкарилиди. У йәнә сақчи әнвәр абдушүкүрниң сайбағ райондики ямалиқ сақчиханисиниң сақчиси икәнликидин хәвири барлиқини билдүрүш билән бирликтә, униң дәл шу җәрянда “арқа көрүнүшидин мәсилә чиқип” тутқун қилинғанлиқ еһтималлиқини әскәртти. Телефонимизни қобул қилған сайбағ районидики 1‏-авғуст сақчиханисиниң хадимидин әнвәр абдушүкүрни сориғинимизда, у әнвәрниң шинҗаң ониверситетида олтурушлуқ икәнликидин хәвири барлиқини ашкарилаш вә тутқундики сақчилар һәққидә мәлумат берәлмәйдиғанлиқини билдүрүш арқилиқ, униң тутқунда икәнликини васитилик һалда дәлиллиди.

Абдусәми җийән иниси әнвәр абдушүкүрниң һәқсизлиққа чидимайдиған, қени қизиқ бир яш икәнлики, шуңа, 2009-йилдики үрүмчи вәқәсидин кейин, уни бир хапилиққа арилишип қалмаслиқ үчүн ата-анисиниң уни японийәгә оқушқа әвәткәнлики, униң японийәгә оқушқа келишигә тутқундики акиси абдухилил абдуреһимниң күч чиқарғанлиқини баян қилди.

Өткән йили уйғур аптоном районлуқ партком сиясий қанун комитетиниң муавин секретари, юқири дәриҗилик әмәлдар ширзат бавудун һәққидә ишләнгән хитайниң бир тәшвиқат филимида или вилайәтлик сақчи идарисиниң муавин башлиқи ялқун дегән кишиниң мисирда оқуған оғли билән охшаш вақитта кесиветилгәнлики баян қилинған. Шу чағда муһаҗирәттики уйғурлар арисида ялқунниң балисини мисирға оқушқа әвәткәнлики үчүн 2017‏-йилиниң бешида тутқун қилинғанлиқи һәққидә ғәйрий-рәсмий хәвәрләр тарқалғаниди.

Телефонимизни қобул қилған үрүмчи сайбағ райони ямалиқ сақчиханисиниң бир хадимиму, әнвәр абдушүркүрниң илгири мушу сақчиханида ишлигәнлики, сақчиларниң “сиясий арқа көрүнүши” тәкшүрүлгәндә униң тәкшүрүштин өтәлмәй қалғанлиқини ашкарилиди. У шу тәкшүрүштин кейин әнвәр абдушүкүрниң иштин тохтитилғанлиқи вә орниға йеңидин 3 хадимниң қобул қилинип ишқа чүшкәнликини тилға алди.

Абдусәми, әнвәр абдушүкүрниң 2021-йили 4-яки 5-айларда тутулғанлиқ еһтималлиқини баян қилғаниди. Мәзкур сақчи хадими әнвәр абдушүкүрниң 2020-йилиниң ахири вә 2021-йилиниң башлири арисида тутулғанлиқини билдүрди.

Мәлум болушичә, әнвәр абдушүкүрдин “мәсилә” чиққандин чиққандин кейин, у тутқун қилинған болсиму, әмма униң делосиниң тәпсилати, йәни аталмиш “гунаһи” ниң немә икәнлики һәққидә униң хизмәтдашлириғиму, һәтта аилә тавабиатиғиму мәлумат бәрмигән.

Абдусәми абдуреһим әнвәр абдушүкүрниң 7 йиллиқ кесилгәнликидин ениқ хәвәр тапқанлиқини билдүргән болсиму, әмма униң җаза муддитини нәдә өтәватқанлиқидин һазирғичә хәвири йоқлиғини ейтти. Үрүмчи ямалиқ сақчихана хадимлириму, униң делосиниң тәпсилати һәққидә мәлумат берилмиди.

Илгирики ениқлашлиримизда үрүмчи атбәйгә сақчиханисиниң муавин башлиқи нурмәмәт йүсүпниң тутқун қилинип сорақта өлгәнлики вә йеңисарда бир түркүм сақчи хадимлириниң аилә әзалиридин “мәсилә” чиққанлиқи үчүн туғқанлири билән бирликтә тутқун қилинғанлиқи мәлум болғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.