Tutqundiki wrach doxtur sayitaji qasimning inisi: akam dölet térrorining hem adaletsiz kespiy riqabetning qurbani

Muxbirimiz shöhret hoshur
2021-09-07
Share
Tutqundiki wrach doxtur sayitaji qasimning inisi: akam dölet térrorining hem adaletsiz kespiy riqabetning qurbani 25 Yilliq késiwétilgen, qeshqer 2-doxturxanining tashqi késeller doxturi, wrach sayitaji qasim ependi a'ilisi bilen. (Waqti we orni éniq emes)
Sawutjan Qasim teminligen

Biz tutqundiki wrach doxtur sayitaji qasimning 25 yilliq késilgenlikini éniqlap bolghandin kéyin, uning tutulush we késilish sewebi heqqidimu melumat igiliduq. Melum bolushiche, sayitaji qasim xizmet munasiwiti bilen töwen'ge chüshkinide yopurghida bir atalmish "Térrorchilar" chüshken méhmanxanida yétip qalghanliqi üchün tutulghan. 2013 ‏-Yilliri Uyghur rayonida saqalliq we hijabliq kishilerning doxturxanigha kirishi cheklen'gen mezgilide, sayitaji qasim, ularni öyige bérip dawalighanliqi üchün döletning diniy esebiylikni tazilash siyasitige qarshi turush bilen eyiblinip éghirlitip jazalan'ghan.

25 Yilliq késiwétilgen, qeshqer 2-doxturxanining tashqi késeller doxturi, wrach sayitaji qasim ependi opératsiye üstide. (Waqti we orni éniq emes)
25 Yilliq késiwétilgen, qeshqer 2-doxturxanining tashqi késeller doxturi, wrach sayitaji qasim ependi opératsiye üstide. (Waqti we orni éniq emes)

Biz qeshqer wilayetlik 2 ‏-doxturxanining wrach doxturi sayitaji qasimning 25 yilliq késilgenlikini éniqlap bolghandin kéyin, uning tutulush we késilish sewebi heqqidimu melumat soriduq. Qeshqerdiki alaqidar xadimlar bu heqte melumat bérishni ret qildi. Melum bolushiche, sayitaji qasimning amérikadiki inisi sawutjan 2017 ‏-yili amérikagha yolgha chiqishning aldida, akisi bilen körüshken we uning tutulush sewebini saqchixana xadimliridin sürüshte qilghan. Saqchi xadimliri uninggha, sayitaji qasimning yopurghidiki bir méhmanxanining aldida mashinisining resimge chüshüp qalghanliqi, mezkur méhmanxanida shu künlerde atalmish "Térrorchilar" yatqanliqi üchün sayitaji qasimningmu soraq qiliwatqanliqini bildürgen.

U, akisining bir kesip ehli ikenliki öz kespiy arqiliq özimu, jem'iyetmu razi bolghudek xizmet qilghanliqi, shunga uning, millet üchün xizmet qilish üchün bashqa bir yollarni tallash mumkinchiliki yoqluqini otturigha qoyidu. U sayitaji qasimning tutulushida, Uyghur rayonida shu mezgilde qaytidin bashlan'ghan siyasiy judunning seweb bolghanliqi yeni uning xitay dölet térrorining qurbani bolghanliqini ilgiri süridu.

Sayitaji qasimning tutqunda ikenlikini tizimlikke kirgüzgen norwégiyediki Uyghuryar fondining türkiyediki wekili batur qaraxanlining bayan qilishiche, sayitaji qasimgha birqanche xil atalmish jinayet artilghan. Bulardin biri, döletning diniy esebiylik siyasitige astirtin qarshi turush dep békitilgen. Sayitajining, Uyghur rayonida saqalliq we hijapliqlar doxturxanigha élinmighan mezgillerde, qérindashliq we insandarchiliq nuqtisidin ularning a'ilisige bérip dawalishi bu atalmish jinayetke pakit qilip körsitilgen.

Sawutjan qasimning akisi sayitaji heqqide bayan qilishiche, sayitaji deslepki qétim tutulghanda, saqchilar uning xizmet ornidin kapalet xéti telep qilghan. Emma, emma doxturxanining xitay rehbiri, bundaq bir kapaletname yézip bérishni ret qilghan. Sawutjanning déyishiche, bundaq bolushigha doxturxana bashliqining xitay bolushidin bashqa, sayitajining kesipte alahide netije qazanishimu seweb bolghan. Yeni doxturxana rehberliri sayitajining nahiyelerge dewet qilinishi we iqtisadiy jehettin ronaq téshpi'idinmu bi'aram bolghan.

Téléfon ziyaretlirimiz dawamida, melum bir idare xadimi, sayitaji qasimning kompyutéridin atalmish qanunsiz matériyallar bayqalghanliqi, buningmu sayitajining diniy esebiylikke baghlinip jazalinishigha yene bir seweb qilin'ghanliqini ilgiri sürdi.

Batur qaraxanlining déyishiche, sayitaji qasim ana tildin bashqa in'glizche we xitay tilinimu yaxshi bilgen ziyaliylardin bolup, millitining teqdiri heqqide dunyada boluwatqan ishlargha köngül bölgen we alaqidar xewer maqalilerni körgen bolushimu mumkin iken.

Yuqirida, qeshqer wilayetlik 2 ‏-doxturxanining wrach doxturi, sayitaji qasimning 25 yilliq késlishining sewebliri heqqidiki éniqlashlirimizni diqqitinglargha sunduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet